يسرا اللوزي عن شخصيتها في "لام شمسية": دور صعب ومرهق نفسيا

تحدثت الفنانة يسرا اللوزي عن دورها في مسلسل 'لام شمسية' الذي يحقق نجاحا كبيرا.

وقالت يسرا اللوزي في لقاء عبر برنامج 'ترندينغ' عبر BBC News: 'الشخصية صعبة ومركبة وأصعب حاجة فيها أنها مش بتتكلم كتير وأن كل مشاعرها وتعبيراتها تبين كل حاجة، واتعلمت في التجربة دي أن دا بيكون أصعب على الممثل من أنه يتكلم، استسهالا في الكتابة الضعيفة بيكون في مونولوج أنا حسيت بكذا بيقعدوا يسترسلوا في كلام في حين أن اللغة السينمائية والشاشة موجودين عشان الصورة والكادر اللي يحيكي أكتر من الكلام'.

وتابعت يسرا اللوزي: 'على قد ما الدور صعب ومرهق نفسيا إلا أنه هو ممتع أنا لسه بصور مبسوطة أنه هيخلص بس هتوحشني رباب رغم الصعوبات'.

وعن تأثير الشخصيات الصعبة عليها قالت يسرا اللوزي: 'في المطلق عادة مش دايما بقول أن الدور بيفضل تاعبني بعدها ولعبت كذا دور كان صعب نفسيا لما بيفوت شهر أو شهرين من التصوير وعندي شغل طول اليوم وبقضي معظم اليوم في الشخصية أكتر من شخصيتي بحس بتقل وفي البيت أولادي وزوجي بيحسوا أن فيا حاجة مش مظبوطة فغالبا أه بعد المسلسل هياخد وقت، مش متقمصة الشخصية في البيت لكن التقل اللي على صدري منها'.

وعن الانتقادات التي وجهت للمسلسل وفكرته قالت يسرا اللوزي: 'أولا الانتقادات دي ناس مش عايزة تشوف الحقيقة خايفين يشوفوا نفسهم في المراية الموضوع مهم وشائك وموجود بكثرة أكتر مما نتخيل، الشائك في الموضوع أن المتحرش بنتخيله شكل شرير أو هيئته واضح عليها أنه متحرش لكن دا جرس إنذار أنه بيكون من ناس مقربين الموضوع مهم ويستحق أننا نتطرق ليه'.

مسلسل 'لام شمسية' من تأليف مريم نعوم وورشة سرد، وإخراج كريم الشناوى، وإنتاج شركة ميديا هب – سعدي وجوهر، وبطولة أمينة خليل، أحمد السعدنى، محمد شاهين، يسرا اللوزى، ثراء جبيل، صفاء الطوخى وعدد آخر من الفنانين.