لقاء الخميسي: بكلم والدي رغم وفاته وبيرد عليا!

عبرت الفنانة لقاء الخميسي، عن حبها الشديد لوالدها، مؤكدة أنها ما زالت تتحدث معه رغم وفاته قائلة: 'بكلم والدي وبيرد عليا، انا بكلمه في الكتابة عندي كشاكيل بكتب فيها، انا بعرف اكتب ومفروض كنت ابقى مؤلفة، وبيبعتلي رسايل في علامات حواليا لأني بركز جدًا في التفاصيل'.

وقالت لقاء، خلال استضافتها ببرنامج 'أسرار' مع المذيعة أميرة بدر المذاع على قناة النهار: 'مبقتش صديقة ريهام حجاج، عشان المقارنة حاجة بتفسد الصداقة، اني اقارن نفسي بيكي مش حلو، ووارد نرجع اصحاب تاني، لان اللي بيحب ميعرفش يكره'.

كما علقت الفنانة على خسارتها فرصة أمام الساحر محمود عبد العزيز قائلة: 'كان هيبقى فيلم مهم وعلامة في حياتي مع محمود عبد العزيز لكن زميلة اخدته مني بعد ترشيحه ليا'.

كما علقت لقاء على أزمتها مع الفنان خالد_سليم، قائلة: 'مسلسل ابواب اشك كان حقي احط اسمي قبل خالد سليم، ومضيت من غير ما اعرف ان خالد سليم هو اللي رشحني، وخالد سليم نجم كبير لكن بشوفه مطرب ومغني جامد، لكن انا اصلي ممثلة، والفرق بينه وبين تامر حسني أنه اتعمله افلام كتير لسنين، والخناقة غريبة لأنه على مين يمين ومين شمال، وخالد عشرة ومتجوز صاحبتي'.

تابعت: 'بقالي سنتين مريحة بفصل، ومش معناه اني مبحبش شغلي، شغلي في راجل وست ستات 11 سيزون مش كسل، لكن اخدت رأي اقرب الناس ليا وقالولي كملي، لكني كنت ضد اني اعمل اكتر من 3 سيزون، وشايفة اني اخد وش القفص وانطلق'.

وأضافت لقاء قائلة: 'كبريائي ذكاء عشان مخسرش حاجات في شغلي واضايق، ومخسرتش كتير، وبحب اشوف نفسي مهمة لاني فعلا مهمة، مبطلبش كتير في الأعمال، ومبحبش حد يعتبرني مش موجودة'.