حكت الفنانة يارا السكري عن ظروف صعبة مرت بها في طفولتها لكنها جعلتها تتحمل أي موقف صعب قج تمر به.

وقالت يارا السكري خلال لقائها في برنامج 'صاحبة السعادة' مع إسعاد يونس: 'كان عندنا صعود وهبوط في المستوى الاجتماعي كان بابا بتمر عليه ظروف في الشغل بيضطر يرجع لنقطة الصفر، في الطفولة كنا متعودين على حاجة معينة وكنا بنرجع لنقطة الصفر كانت ماما بتدربني من الأول أن متجبليش كل حاجة، بابا مبسوط بيا وبيحبني وعايز يجبلي كل حاجة، يجيبلي تليفون ياخده مني وتقولي مفيش تليفون في السن دا'.

وتابعت يارا السكري: 'عايزة اشتري لبس العيد زي قرايبي، العيد 4 أيام عايزة 4 أطقم لبس كانت تجيبلي طقم واحد بس وأقولها هو أنا هلبس كل يوم نفس الطقم تقولي أه انتي اللي هتحليه مش اللبس اللي هيحليكي، وقتها اشتريت 'جيب' وسعرها بسيط وبلوزة عادية وعملت شعري، وكلهم لابسين لبس غالي حواليا، وخرجنا وكل الناس كانت بتقولي شكلك حلو أوي جايبه اللبس بتاعك منين وأنا أحس أنهم هيتريقوا عليا، تاني يوم محدش ياخد باله إني لابسه نفس الطقم بغير تسريحة شعري وشكلي ويبان أنه طقم تاني، من هنا اتعلمنا القناعة، المصروف بتاع المدرسة مكانش مصروف كبير تاخد الساندويتش ومصروف على القد'.

واختتمت كلامها: 'لما حصلت لنا الظروف دي قدرنا أننا نعيش بالموجود كانت تمر علينا أوقات التلاجة فاضية لكن الناس تشوفنا كأننا ولاد ذوات'.

يشار إلى أن يارا السكري شاركت في موسم رمضان 2026 بمسلسل 'علي كلاي'.

ويشارك فى بطولة مسلسل 'علي كلاي' إلى جانب أحمد العوضي كل من درة، يارا السكري، محمود البزاوي، انتصار، عصام السقا، محمد ثروت، طارق الدسوقي، سارة بركة، ريم سامي، ضياء عبد الخالق، رحمة محسن، عمر رزيق، وغيرهم من الفنانين.