لم يتمالك النجم حسين فهمي دموعه عند حديثه عن شقيقه الراحل مصطفى فهمي، خلال حلوله ضيفا في برنامج 'العرافة' الذي تقدمه بسمة وهبة.

قال حسين فهمي: 'كان لذيذ وكنا اصحاب، اكتر من إخوات، والصداقة مهمة في هذه العلاقات، وهو أخويا الصغير، بس كنت دايما أقول له إنت أخويا الكبير، هو اللي بينصحني ويقول لي اعمل كدة واعمل كدة'.

وأضاف حسين فهمي: أنا بس بفكر فيه إن هو سافر، يعني أنا بالنسبة لي هو مسافر، موجود في حتة وهشوفوه لما يرجع، أنا بشوفها كدة.

واستكمل حسين فهمي: الظروف كانت صعبة جدا، مصطفى تعب وأنا في فترة الإعداد للمهرجان، وكان لازم أقوم بواجبي، كانت فترة صعبة أوي، شغلتنا كدة، بنعمل عمل جماهيري، والجماهير مالهمش ذنب، في حاجات لازم نعملها، بنقف على المسرح وزميل لي كان معايا الليلة اللي فاتت وتوفى في حادثة، وأنا لازم افتح الستارة، بتضري تعمليها، شغلتنا صعبة مش سهلة، معندناش رفاهية إنك تقولي لأ أنا عايزة اخد فترة للحزن.

وتحدث حسين فهمي عن علاقتهم بشقيقه الراحل مصطفى فهمي، قائلا: 'كنت بلاقي حد اتكلم معه، وادردش معه وفاهمني وفاهمه، الصداقة هنا عدينا مرحلة الأخوة الصداقة بتبقى أقوى'.

يذكر أن الفنان مصطفى فهمي توفي في الساعات الأولى من صباح الأربعاء 30 أكتوبر بعد تدهور حالته الصحية، وكان مصطفى فهمي قد أجرى عملية جراحية دقيقة في المخ لإزالة ورم في أغسطس الماضي.