بعدما لفت الأنظار في رمضان الماضي بدوره في مسلسل 'سيد الناس'، شارك الفنان مصطفى عماد في رمضان 2026 في مسلسلين 'الست موناليزا' و'حد أقصى'.

وقدم مصطفى عماد دورين مختلفين، فهو 'محمود' الطيب الوحيد في عائلة 'حسن' زوج 'موناليزا' الذي وقف معها وساعدها حتى النهاية، وهو 'حسن' الشاب الذي تتغير حياته بسبب تصرفات حبيبته التي تدفعه للخطف والتفكير في القتل.

تواصل FilFan.com مع مصطفى عماد ليحدثنا عن كواليس المسلسلين وردود فعل الجمهور على أدواره.

في البداية تحدثنا عن مسلسل 'الست موناليزا' ودور 'محمود' وقال لنا: 'الدور عجبني جدا في الأول من الأدوار اللي بتمس القلوب الأدوار الطيبة المؤثرة زي 'سيد الناس' السنة اللي فاتت كان مؤثر، فأكتر حاجة شدتني ليه أنه طيب وحضرت للدور مع المخرج والمؤلف ورسمنا ليه الملامح والحمد لله ربنا كرمنا'.

أغلب مشاهد مصطفى عماد كانت مع مي عمر وحكى لنا عن كواليس العمل معها قائلا: 'كواليس الشغل مع مي عمر جميلة جدا الواحد بيحس أنه أسرة جو عائلة، خاصة في المشاهد مع شيماء سيف إحنا التلاتة كنا بنحس إننا زي الإخوات والأصحاب، أستاذة مي عمر حنينة جدا سواء في المشهد أو برا المشهد، بتدي طاقة جميلة'.

ورغم ما مرت به 'موناليزا' من صعاب ومشاكل كان الخط الكوميدي الوحيد في المسلسل بينها وبين 'محمود' مصطفى عماد و'ابتسام' شيماء سيف، وقال عن كواليس هذه المشاهد: 'الخط الكوميدي مع شيماء سيف ومي عمر كان موجود في الورق هم الـ3 شخصيات في الآخر بيساندوا بعض وبيكبروا مع بعض وبينهم مواقف جميلة'.

وعن أصعب المشاهد في مسلسل 'الست موناليزا' قال: 'أصعب مشهد ليا في الحلقة الرابعة لما 'حسن' أو أحمد مجدي بيضربني بالقلم ودي كانت صدمة أن أخويا مد إيده عليا قدام أبويا'.

وعبر مصطفى عماد عن سعادته بردود فعل الجمهور على دوره في 'الست موناليزا' قائلا: 'ردود فعل الجمهور كانت جميلة الناس كانوا بيحبوني وبيقولوا مفيش غير 'محمود' الطيب هو و'ابتسام'، في الأول كانوا شاكين فينا ودا عنصر مفاجأة أو تخمينات للجمهور بس الحمد لله طلعت في الآخر طيب'.

ومر فريق العمل بوقت صعب مع تصوير آخر الحلقات عندما توفي والد الفنانة مي عمر، وقال مصطفى عماد عن ظروف التصوير: 'التصوير في آخر الحلقات الحمد لله كان باقي لنا مشاهد قليلة والحمد لله أنها خلصت على خير بعد الموقف الصعب اللي مرت بيه مي عمر بوفاة والدها'.

وإلى جانب 'الست موناليزا' شارك مصطفى عماد في مسلسل 'حد أقصى' وحدثنا عن كواليس المسلسل قائلا: 'كواليس مسلسل 'حد أقصى' كانت جميلة لأن أستاذة مايا أشرف زكي بتوجه الممثلين حلو جدا والدور حضرت ليه معاها وكان لما يبقى الحاجة مش كويسة كانت بتيجي بيني وبينها توجه بطريقة حلوة جدا'.

وعن رد فعل الجمهور على دوره قال: 'ردود الفعل كانت حلوة وأن الشخصية كانت مختلفة عن شخصية 'محمود' وأنه بقى شرير بسبب تعرضه لمواقف مع البنت اللي حبها ورد فعل على اللي عملته عشان مش عارف يوصلها'.

وفي مسلسل 'حد أقصى' تتعرض البطلة لصدمة في البداية عندما تجد في حسابها البنكي مبلغ مالي كبير، فسألنا مصطفى عماد إذا تعرض لنفس الموقف كيف سيتصرف وقال: 'لو لقيت في حسابي مبلغ كبير زي اللي حصل لروجينا هتصدم طبعا وهعرف الفلوس جات لي إزاي ولو عن طريق حاجة حرام أكيد هرجعها ومليش دعوة بيها'.

وعن جديده الفترة المقبلة قال مصطفى عماد: 'لسه مفيش حاجة جديدة، الفترة اللي جايه أنا بسيبها على الله مش محدد حاجة، إن شاء الله السنة اللي جايه تجيلي أدوار حلوة زي السنة دي'.

بيتر ميمي يرد على كابتن إيلا بعد تعليقها على مسلسل 'صحاب الأرض'