كشفت الفنانة لوسي إنها لم تتخذ قرار اعتزال الفن بل فقط تفكر في الأمر.

وفي مداخلة هاتفية مع برنامج 'من ماسبيرو' أوضحت لوسي قائلة: 'أنا قلت أنا بفكر في الاعتزال مش قررت اعتزل لأن أنا عندي مسئولية عندي فيلم بخلصه وعندي مسلسل تبع قطاع الإنتاج بس متوقف للظروف المادية، تخلص المسئوليات اللي عليا وأقول أنا من بكرا توقفت عن التمثيل'.

وتابعت لوسي: 'أنا توقفت عن الرقص بمزاجي، لكن التمثيل عشان ورايا ارتباطات قلت إني بفكر اعتزل في حاجات كتير مش عجباني ومش مريحاني ورق بيجيلي مش المفروض يجيلي، أنا غضبانة الطريقة والمواعيد والورق أنا مفتقدة الأستاذ أسامة أنور عكاشة مفتقدة الناس اللي بيطلعوا من جوا قلبي الجملة، بيجيلي ورق بقول يا عيني على القلم اللي اتكتب بيه الكلام الفارغ دا إحنا في تدهور'.

وأكملت: 'مش عيب إننا نقدم أشكال جديدة بس نعملها بمنطقية مش بتفاهة، أما يجيلي مسلسل اسمه 'جدتي كسرت رجل الكرسي' وألاقي حاجات فيها ألفاظ خارجة وأنا مبتلفظش ألفاظ خارجة، إحنا ملوك الدراما، اتفرج على مسلسل تركي بتفرج على مناظر ولبس شيك بتفرج على هندي وسوري بتفرج علشان اتعلم وبتفرج على نفسي عشان أشوف أخطائي إيه محدش هيقولهالي'.

واختتمت لوسي حديثها: 'أنا هاخد القرار إن شاء الله بعد رمضان أكون خلصت الحاجة المشتركة فيها، لو الدنيا حلوة وفي ورق كويس وشركة إنتاج وأجر كويس هعتزل ليه؟ أنا ممثلة كويسة وشاطرة وملتزمة والناس بتثق في اسم 'لوسي' والعمل اللي بتشارك فيه أنا مش بشارك في أي عمل أنا ممكن أقعد سنتين تلاتة مبشتغلش عشان مفيش حاجة حاسه بيها'.