أثارت الفنانة عنايات صالح جدلاً واسعاً بتصريحاتها عن مشاهد الاغراء، ومشكلة بعض المخرجين مع الحجاب، مؤكدة انه لا يعرض عليها المشاركة في أي عمل منذ ارتدائها الحجاب.

واوضحت الممثلة المصرية خلال لقائها في برنامج 'قعدة ستات': 'أنا لبست الحجاب من 3 سنين، والمخرجين عندنا بيكرهوا الحجاب عندهم مشكلة، كان زمان المخرج يروح المسرح والمعهد يشوف الشباب ويختارهم للأدوار، لكن دلوقتي الموضوع اختلف النجم هو اللي بيختار'.

وأضافت: 'كنت بشتغل 3 أو 4 مسلسلات في السنة، وبعد الحجاب قعدت في البيت ولا حد بيتصل بيا، النجوم الجديدة ميعرفوناش، أنا اشتغلت مع كبار المخرجين دلوقتي يقولوا تعالي أعملي اختبار أداء، أروح أعمله مع مخرج مساعد إزاي وأنا اشتغلت مع مخرجين كبار، عديت المرحلة دي من زمان، لكن قلت أجرب رحت لقيت 2 قاعدين صغيرين في السن وكاميرا وخدي المشهد دا قوليه عشان يشوفوا أنفع ولا لأ، أنا زعلت من نفسي أني رحت'.

وتحدثت عن مشاهد الإغراء الجريئة التي رفضتها في بداياتها وقالت: 'أنا استبعدت من مسلسلات كتيرة جدا بسبب المعاكسات، وأنا طالبة في المعهد جاء مخرج من الكبار بتوع السينما وقالي تعالي إنتي هند رستم الجديدة، وقالي هنعدي نروح مدينة السينما يعملي تجربة أمام كاميرا، وبدأ يقولي عندك بطن عايزة تنزل شوية وبدأ يحط إيد على بطني وحاول يتحرش بيا، وأنا صرخت عليه واتخانقت معاه، ومخرج تاني كبير أوي طلب مني أروحله المكتب بتاعه عشان اقرأ السيناريو معاه واكتشفت أنه مش مكتب أنه بيته فمروحتش'.