استعاد الفنان إيهاب توفيق ذكريات طفولته وحكى أنه كان طفلا شقيا ويسبب الكثير من المشاكل.

وحكى إيهاب توفيق خلال لقائه ببرنامج 'معكم' مع منى الشاذلي قائلا: 'أنا مكنتش عارف أنا شقي ليه مكنش فيه سبب، شقاوة في المدرسة ومناوشات مع المدرسين، خناقات في المدرسة وضارب حد واستدعاء ولي أمر'.

وتابع إيهاب توفيق: 'أكبر خناقة كنت في الشارع أنا كنت من مواليد وسكان حي الظاهر، كان سني 12 سنة والولاد اللي كانوا في المنطقة اجتمعوا عشان يضربوني كل واحد كان عندي معاه مشكلة، كنا في العيد وكان جايلي هدية بندقية خشب، وأنا في الشارع حسيت أن فيه غدر هيحصل، مسكت البندقية من الحتة الحديدة والشارع كله بيجري قدامي كنت بدافع عن نفسي'.

وأكمل إيهاب توفيق: 'وأنا في 2 ثانوي أخدت بالي أن الناس ابتدت تضايق وقعدت مع نفسي ولقيت نفسي أني غلط وليه متخليك كويس مع الناس ويحبوك عشان أنت كويس وطيب وبتحبهم، مش عشان بيخافوا منك'.