أوضحت الفنانة الشابة أميرة أديب سبب ظهورها في فيديو تحدث فيه عن مرورها بفترة اكتئاب، مؤكدة أن هذا الاكتئاب لم يكن بفعل الانتقادات التي تتعرض لها بل لعوامل كثيرة مجتمعة.

وقالت أميرة أديب أن النقد لا يزعجها ما يزعجها هو وجود أشخاص بداخلهم كم كبير من الكره.

وأضافت خلال لقائها في برنامج on the road مع بلال العربي: 'اللي ضايقني مش الانتقادات ولا التنمر من وأنا صغيرة وأنا مش مفهومة من وأنا صغيرة البنت اللي بتلبس اللي هي عايزاه وبتقول اللي عايزاه وأنا عندي أصحابي اللي فاهمني ومتقبلني، أنا في فترة في حياتي مريت بكذا تجربة وقعتني كان درس ورا درس حسيت إني فاتحة سنتر هيجوا ياخدوا دروس عندي، وكنت بتعب أوي عشان أقدم شيء فلاقي الناس بتشتمني، وناس من برا حطاني في مكانة عالية بس أنا اللي فارق معايا بلدي، كنت بتشتم كتير وكنت في علاقة مكانتش أحسن حاجة كان محسسني إني مش كويسة ومع الناس اللي بتكرهني صدقت إني مش كويسة ما أنا بني آدمة كنت متضايقة أن الناس مش بتحبي، أنا بحاول أقدم حاجة تخلي الناس تبتسم وتحب نفسها، كل حاجة بعملها هو شيء أنا حاسه بيه'.

وأكملت: 'كان في سنتين هجوم كبير ومكنتش عايزة أظهر خالص كنت بخاف لما لقيت ناس بتقولي موتي نفسك وناس بتقولي إنتي قبيحة مع أن أنا مش فارق معايا، لما طلعت أتكلم عن الاكتئاب مكنتش بستعطف الناس دي كانت الحقيقة كنت بقول إني راجعة وعادي إن حد يجيله اكتئاب، وأنا مكتئبة كان نفسي أشوف حد بيقول إنه كان مكئتب وفاق منه، في فترة كنت مش بقبل شغل وقافلة على نفسي فكنت عايزة أقول إني تمام'.

وأشارت أميرة أديب أن العمل في الوسط الفني كان سببا أيضا في اكتئابها قائلة: 'الشغلانة كانت مأثرة عليا كنت بسمع كتير لازم تعملي مناخيرك والدور دا مش هنديهولك لو حطيتي فيلر هناخدك، ناس تقول لازم تبقي أنانية ولازم تبقي قليلة الأدب كنت بسمع حاجات عكس تربيتي وفطرتي وأكيد كنت بتأثر بيها'.