علقت الفنانة هالة صدقي على إعلان المخرج محمد سامي اعتزاله إخراج الدراما التليفزيونية، والذي تسبب في جدل كبير بين الوسط الفني الفترة الماضية.

قالت هالة في تصريحات إعلامية: 'محمد سامي مرهق عصبيًا ونفسيًا، بيشتغل من أغسطس في عز النار لغاية النهاردة، 7 أو 8 شهور بشكل متواصل من غير إجازة، وبيشتغل 16 و 17 ساعة في أجواء صعبة'.

أضافت: 'اللوكيشن بتاعنا كان في السكاكيني ودرجة الحرارة 40، في شقة صغيرة فيها 200 شخص، وممنوع نشغل تكييف أو مروحة علشان الصوت، وهو بيفكر في المشهد والتفاصيل والإضاءة والديكور، وضغط عصبي غير عادي'.

وردًا على سؤال هل يتعرض محمد سامي لانتقادات مبالغ فيها، قالت هالة صدقي: 'أي حد ناجح لازم يبقى في شوية حقد وغيرة. ما شاء الله عامل مسلسلين كبار من أهم المسلسلات على MBC، لازم يبقى في نفسنة'.

تابعت: 'أنا سعيدة بنجاحه، هو يمكن بيصور طول والوقت ومش حاسس بالنجاح ومش بيستقبل غير السلبيات، لكن هو رقم واحد في شاهد في العالم والوطن العربي وأوروبا وأمريكا'.

وعن كواليس اختيارها لتقديم دورها في مسلسل 'إش إش'، الذي يعرض في شهر رمضان، وتعاونها مجددًا مع محمد سامي، قالت هالة صدقي: 'كنا محتارين، ومحمد سامي قال لي تعملي إخلاص كابوريا أو شادية، إخلاص كمان كبيرة وشخصية مهمة'.

أضافت: 'كنت هعمل إخلاص والشخصية عظيمة، وانتصار عملتها بعبقرية شديدة، لكن أنا حبيت إني أعمل حاجة مختلفة وماعملتهاش قبل كده، ولقيته هو كمان مقرر كده'.

وأوضحت أن دورها كان تحديًا بالنسبة لها قائلة: 'هو نجاح لهالة صدقي شخصيًا، ممكن الشخصية معملتش ضجة كبيرة زي صفصف، وإحنا لسه في نص الحلقات، لكن إني أقدر أعمل دور شريرة، كانت صدمة أكيد للناس، لأنهم متوقعين مني حاجة كوميدي'.

تابعت: 'لازم الممثل يغير نوعية أدواره، وده كان تحدي كبير لنا أنا ومحمد سامي'.

مسلسل 'إش إش' تدور أحداثه في إطار شعبي اجتماعي، حول 'إش إش' التي أجبرتها الحياة على العمل كراقصة شعبية رغمًا عنها، حيث إن عملها يعد مصدر الدخل الوحيد لعائلتها، ولكنها دومًا تتمرد على حياتها وتحاول النجاة منها من خلال إصرارها الشديد على التعليم.

والمسلسل من بطولة مي عمر، هالة صدقي، محمد الشرنوبي، انتصار، دينا، إدوارد، ماجد المصري، طارق النهري، عصام السقا، علاء مرسي، شيماء سيف، ندى موسى، إيهاب فهمي، خالد الصاوي، والعمل سيناريو وحوار محمد سامي ومهاب طارق وإخراج محمد سامي.