تحدث الإعلامي تامر أمين عن أزمة الفنانة محمد رمضان مع نقابة المهن الموسيقية بسبب خلعه لملابسه على المسرح في حفلاته ووجه بعض الأسئلة للنقابة.

وفي برنامجه 'آخر النهار' دافع تامر أمين عن محمد رمضان وقال: 'أنا بطرح سؤال أرجو أن نقابة الموسيقيين ترد عليه وتحسمه عشان نقفل الجدل اللي من النوع دا للأبد، هو محمد رمضان مطرب؟ هل ما يقوم به محمد رمضان عندما يقدم حفلة طرب غناء بالمعنى المفهوم للغناء واحد واقف وماسك مايك وبيغني، اللي عارفينه وشايفنيه أن طول عمر حفلات محمد رمضان لأ هو مش بيعمل كده، هل في نقابة الموسيقيين في حاجة اسمها حفلة استعراضية تطلع تصريح أن الحفل استعراضي مش طربي؟'.

وتابع تامر أمين: 'محمد رمضان بيعمل حاجة تانية وأنتوا عارفين كنقابة الموسيقيين الحاجة التانية وهي حفل استعراضي اللي هو برا اسمه 'شو' يعني الناس مش رايحة تسمع طرب الناس رايحة تتفرج على 'شو' ليه علاقة بالإضاءة والحركات الاستعراضية اللي بيعملها على المسرح هو والفرقة بما في ذلك دخوله بالعربية على المسرح دا جزء من 'الشو'، السؤال سواء قلع لبس، وأنا طبعا ضد القلع، بس بتكلم على المبدأ هندي حد تصريح لحفلة طربية دي ليها مواصفات، حد هياخد تصريح لحفلة استعراضية ليها مواصفات ولازم نحسبها لكن كل مرة يبقى في جدل'.

واختتم تامر أمين حديثه: 'وعلى القلع متزعلوش مني ما في ناس تانية بتقلع وسايبينهم ولا هو قلع الرجالة غلط وقلع الـ…؟ هتخلونا نتكلم ونغلط، الصح الصح والحياء حياء عند الكل'.

كان محمد رمضان أحيا حفلا غنائيا في الساحل الشمالي وأثار جدلا وأزمة بسبب خلعه لقميصه على المسرح وهو ما دفع الفنان مصطفى كامل، نقيب المهن الموسيقية، لتهديده إذا تكرر هذا الأمر مرة أخرى سيتم منعه من الغناء في مصر.

وبالفعل أحيا محمد رمضان بعدها حفلا في رأس البر ولم يقم بخلع ملابسه ونشر فيديو من الحفل وهو يقلع الـ'تي شيرت' لكن يتراجع وقال: 'الحمد لله امبارح صوت نقيب الموسيقين رن في ودني على أخر لحظة. أكن كل التقدير والاحترام لقوانين نقابة الموسيقين المصريين وللسيد النقيب مصطفى كامل'.