شنت النجمة شهيرة هجوماً شرساً على منتقدي الفنانين والذين يحاولون التدخل في الحياة الشخصية للفنان والربط بين أعماله الفنية ومعتقداته الدينية.

قالت شهيرة: 'ليس من الضروري أن يقدم العمل رسالة، لكن لابد أن يستفيد الجمهور من العمل حتى لو كان عملًا كوميديًا، أحيانًا الفنان يقدم أعمالًا بغرض الترفيه وهذا في حد ذاته رسالة، الإحساس بالبهجة والفرح والخروج من الضغط النفسي رسالة'.

تابعت: 'الفن له دور كبير في حياة البشر، لكن هناك ناس يحاولون التقليل من شأن الفن لكنهم يضحكون على أنفسهم، لا حد يستطيع أن يعيش من غير فن'، مضيفة: 'هو في حد يقدر ميشفش التليفزيون ولا يسمع راديو أو مزيكا؟، أو يشوف عمل ترفيهي يخرجه من ضغوط الحياة؟'.

وأردفت شهيرة: 'في ناس بتقول انشغل بالقرآن والعبادات، ولكن مفيش منطق بيقول كده، القرآن والعبادات لهم وقتهم، والترفيه له وقت، علي بن أبي طالب قال روحوا عن القلوب ساعة فساعة، فإنها إذا كلت عميت، لازم نرفه عن القلوب'.

أما عن تدخل الجمهور في الحياة الخاصة للفنان، فعللت شهيرة قائلة: 'الموضوع ده محتاج دراسة نفسية، الجمهور بيتدخل في حياة الفنان على أي أساس؟ الجمهور ممكن يقول رأيه في العمل اللي الفنان بيقدمه ولكن مياخدش دور الناقد الفني خاصة أنهم مش متخصصين، لكن التدخل في الحياة الشخصية للفنان وإلزامه بإظهار تفاصيل حياته مش مقبول'.

وواصلت: 'الفنان إنسان وله حياته الخاصة ومحارمه، الفنان ليس سلعة، الناس اللي بتنتقد دي محتاجة تتعالج، لو أنتم شايفين الفنانين شياطين، ليه لما بيشوفونا في مول ولا أي مكان بيجروا ورانا علشان يتصوروا؟ أو يشفونا في العربيات يشاوروا ويحاولوا يتكلموا معانا؟، أنا مش فاهمة التناقض ده بصراحة، مينفعش يهينوا الفنان بأي شكل من الأشكال، دول مرضى نفسيين'.