حكى الطفل منذر مهران الذي قدم دور 'حسن' في حكاية 'لعبة جهنم' من مسلسل 'القصة الكاملة' كواليس مشهد قتله في العمل.

وقال منذر مهران في لقاء مع ET بالعربي: 'مشهد القتل لما كان بيخنقني دا كان رخم أوي أنا طلعت مجهودي فيه كنت بكتم نفسي وبطلع عرق من جنبي كده وأستاذ إسلام خيري قالي أنت بتطلع العرق دا إزاي أنت بتكتم نفسك كده هتموت، زعقلي عشان كنت بكتم نفسي كتير قلت له أنا عايز أطلع المشهد صح متخافش عليا'.

وعن نجاح الدور قال: 'المسلسل دا كان دور غريب أنا عمري ما مثلته ونجاح غير طبيعي وأنا مكنتش متخيل النجاح دا وشخصية 'حسن' تخلي الناس كلها تعيط'.

وكشف منذر مهران كواليس تحضيره للشخصية قائلا: 'دخلت جوا الشخصية قعدت اقرأ السيناريو وفهمت الدنيا بتتكلم عن إيه وبحثت عن الجريمة والشخصية عاملة إزاي، الطيبة الزايدة كانت لازم تكون في الشخصية ودا اللي خلى الناس تحبني وتزعل عليا لما يموت'.

وتابع: 'أنا بحب التصوير وبتمزج وأنا بعمل المشهد وبطلع للناس أحسن حاجة مش بحب أطلع نص نص وبطلع كل مجهودي في التصوير لحد ما اتعب خالص'.

وعن علاقته بالفنان محمد فراج خلال تصوير المسلسل: 'أستاذ محمد فراج لذيذ أوي ولطيف، خفت منه في المسلسل شكله مخيف أول ما شفته بلبس الشخصية مكنتش عارف أن هو، ولما قلع النضارة بصيت له قلتله أنت إيه اللي حصل فيك هو ممثل جامد وإحنا في التصوير مكانش عايز يطلع من الشخصية'.

وحكاية 'لعبة جهنم' بطولة محمد فراج وعمر رزيق والطفل منذر مهران وغادة طلعت وكريمة منصور، ياسر عزت، والعمل من تأليف نجلاء الحديني وإخراج إسلام خيري.