حل الموزع الموسيقي أحمد إبراهيم ضيفا على برنامج 'آرتيستيك'، تقديم ليلي بدران على راديو هيتس، حيث تحدث عن مشاركته في أعمال الهضبة عمرو دايب، وألبومه الغنائي الجديد.

وقال أحمد إبراهيم: 'صعوبة الشغل مع عمرو دياب إن كل سنة بتيجى بنجاح كبير والسقف بيعلى، والحمد لله تأثير نجاح الألبوم باين في كل حتة الشارع وكل الأماكن'.

وأضاف: 'توزيع أغنية 'لولا البنات' هو نفسه بتاع الكليب، وكن نقدر نقول عليه إضافات زى أصوات الكورال. في البداية دخلنا إلكترونيك وشوية شرقي، وقبل ما الماستر يخلص ما كنتش مبسوط ولا هو، وعمرو دياب اللى ملحن الأغنية وكان متأثر بالفلكلور، وقلت له عاوز أفتحها تانى وأزود ليها، واشتغلت عليها مرة واتنين مع نفسي، لحد ما جات لى فكرة إنى أدخل الإيقاعات الريفية مع الصقفات الطبيعية اللى في الفلكلور'.

وتابع: 'تخيلت المشهد لما بتعدي على ترعة وتلاقي البنات بيصقفوا ويغنوا بشكل جميل، والأحلى إننا سجلناها طبيعية مش إلكترونية، فزودت محبة الناس ليها لأنها شبهنا'.

تحدث أحمد إبراهيم عن تفاعل الجمهور مع الأغنية قائلا: 'اتقال إن الكليب اتعمل بعد ما الناس ابتدت تتفاعل مع الأغنية ويتصورا بتفاعلهم معاها، ولكن ده محصلش، لأن المخرج الكبير طارق العريان كان عنده رؤيته من الأول'.

وأكمل: 'لولا البنات اعتبرها زى دم جديد، وأعتقد يومين التأخير للكليب زودت تفاعل الناس معاها، وشايف إنها من أنجح الأغاني'.

كما كشف أحمد إبراهيم عن رد فعل عمرو دياب بقوله: 'عمرو دياب قال لي ده أنجح أغنية وكليب بعد حبيبى يا نور العين، كمان الكليب تانى مشاهدة على مستوى العالم'.

وحول تعاونه مع الهضبة عمرو دياب قال: 'الحمد لله بقالى 25 سنة، والهضبة 40 سنة على القمة، فبقي عندنا التصور إزاي نحط خطة عمل نمشي عليها، عمرو دياب مش بس معلم، ده ما بيرحمش في الغنا'.

وأشاد أحمد إبراهيم باحتفاظ عمرو دياب بموقعه على القمة قائلا: 'الهضبة عامل عدد أغاني مش طبيعي غير اللي نزل، مع إنه مشغول ما شاء الله في حفلات وأفراح طول الوقت، وكان معانا 30 أغنية، بس لما سمعت الأغانى النهائية، فهمت قد إيه عمرو دياب عنده رؤية. عمرو دياب غنى كل حاجة، وجرب كل حاجة ومع ذلك مش بيكتفي، وبحسد نفسي على شغلي مع موهبة ونجومية فارقة مثل عمرو دياب'.