تحدث الفنان محمد العمروسي عن شقيقته الراحلة ووصفها أنها كانت مثل الابنة لها.

وقال محمد العمروسي خلال لقائه في برنامج 'بالمايك والقلم' من تقديم عبد العزيز أحمد ردا على سؤال إن كان لديه شخص عزيز على قلبه قد توفي: 'عندي أعز حاجة رحمة أختى دي كانت بنتي ربنا يرحمها'.

وتابع ليرد على سؤال آخر وإن كان لديه قدرة على إحياء شخص ما من يكون ليجيب: 'لو عندي القدرة إني أحيي حد هحيي أختي الله يرحمها، رحمة بقالها 3 سنين متوفية، أنا كنت بتعامل معاها إنها بنتي، هي توفت عندها 19 سنة حادث ومفيش في إيدينا غير إننا نقول إنا لله وإنا إليه راجعون'.

وخلال اللقاء تحدث محمد العمروسي عن زوجته الفنانة مي فاروق.

وقال محمد العمروسي: 'مي فاروق الرزق اللي ربنا بعتهولي أنا اتعرفت عليها بالصدفة شعور لما تبقى ماشي في ضلمة وفجأة تلاقي النور، هي وشها حلو عليا جدا وجات نورت حياتي، الحياة استقرار، استقرار روحك وأنا روحي استقرت معاها ودي كانت أهم حاجة بالنسبة ليا'.

وعن أول لقاء جمعهما حكى محمد العمروسي: 'اتقابلنا في فرح المخرجة بتول عرفة وهاني الطمباري، أنا كنت متضايق ومش عايز أروح الفرح وهي كذلك، صديق ليا ألح عليا وروحت الفرح وهي كمان واتقابلنا ولما حكينا لبعض المواقف عرفت أن ربنا بيقربنا من بعض وعايزنا نتقابل'.

وأكمل محمد العمروسي: 'هي بالنسبة ليا ست البنات مش بشوف حد غيرها وهي حاجة كبيرة أوي بحترمها وهي بتحترمني وبتمنى ليها كل التوفيق والسعادة'.

وكانت مي فاروق احتفلت بزفافها على محمد العمروسي يوم 2 يناير 2025 وسط حضور عدد من النجوم.