رد المطرب رامي جمال على تعليقات الجمهور الذي تحدث فيها عن طرحه لألبومه قبل طرح الفنان عمرو دياب لألبومه بأيام.

وقال رامي جمال خلال لقائه في برنامج 'أجمد 7' مع جيهان عبد الله على 'نجوم FM': 'عمرو دياب لا ينافس، عمرو دياب خلاص حفر تاريخ أسطوري عشان تتكلم في المنافسة محتاج 40 أو 50 سنة تنجحهم والجمهور يقرر، وأنت مش من جيله عشان تتقارن بيه، وأنا واحد من جمهور عمرو دياب المتعصب لأن فيه جمهور بيبقى بيحب المزيكا فبيسمع رامي وبيسمع عمرو دياب وبيسمع كله'.

وتابع رامي جمال: 'في ناس بتقول أنت إزاي نازل مع عمرو دياب دا كان يتقال زمان أيام مبيعات الشرائط والسي دي، القوة الشرائية بيبقوا سن من 15 لـ 25 سنة وغالبا بياخدوا مصروف وساعتها فعلا لو ألبومي نزل مع ألبوم عمرو دياب فـ بنسبة 90% هيشتروا ألبوم عمرو دياب، لكن إحنا في عصر الأونلاين، لو عجبك من أغاني عمرو دياب هتسمعها هتاخد من أغاني ألبوم رامي جمال'.

وعن تصدر التريند قال رامي جمال: 'أنا نزلت قبل عمرو دياب ألبومي وكنت متصدر تريند يوتيوب وبعدها نزل عمرو دياب وتصدر، وليا الشرف أن اللي أخد مني تريند المزيكا أنا بعتبره صاحب الشغلانة والأسطورة الحية في العصر اللي إحنا فيه، شفت أحلام كتير أوي في حياتي وسنين عدت وأنا قاعد كده في الوقت اللي ألبومه فيه نزل وهو بياخد المكان اللي أنا أصلا عيني ممكن توجعني لو مشفتوش بياخده، أن هو يبقى رقم 2 مع أن هو حلم مشروع أنك تحلم أن تكون في الصدارة بس أنا بحبه أوي ومعنديش الحسبة دي، وتجاريا مبقتش حسبة موجودة، أكيد الناس بتركز في وقت نزول ألبوم عمرو دياب، لكن زي ما بشوف ناس كاتبة إزاي تنزل مع عمرو دياب بصراحة بشوف ناس كتير كاتبة ألبومك جميل وكل أغانيه حلوة'.

ووجه رامي جمال رسالة للمتعصبين من جمهور أي فنان وقال: 'بقول للمتعصبين إحنا شغالين في مزيكا وبنحاول نبسطكم، انبسطوا ماتحولوش لا تضايقوني بتعليق لأني مش هتضايق'.