عبرت الفنانة يسرا عن حزنها الشديد لوفاة 'ياسمين' ابنة الفنانة نجلاء فتحي والفنان يسف أبو النجا ووصفت ما تشعر به بـ'القهرة'.

وقالت يسرا خلال لقائها في برنامج 'الصورة مع لميس الحديدي': 'موضوع نجلاء فتحي ووفاة بنتها أنا خايفة عليها، البنت دي مولودة على إيدي أول عملية ليها كنت معاها ومع نجلاء في مستشفى في الإسكندرية، وقعت مرة اتزحلقت وديناها المستشفى والبنت كانت راضية بكل اللي ربنا كتبهولها'.

وتابعت يسرا: 'أنا مقهورة قهرة محدش يتصورها وبفكر في نجلاء طول الوقت وخايفة عليها جدا وللاسف مكنتش في مصر عشان أعرف أعزيها ومش عارفة اروح لها عشان هي رافضة تشوف أي حد وأنا مقدرة جدا، ياسمين كانت ملاك مش بشر، يعني قهرة زي دي مكنتش هستحملها'.

وخلال اللقاء كشفت يسرا أنها تحمد الله أنها لم تنجب قائلة: 'أنا في جوازتي الأولانية كنت عايزة أخلف وفعلا حملت مرة أو مرتين ومحصلش نصيب أن البيبي قعد، خلاص مش هعاند مع ربنا، في حاجات بتاعة ربنا ولازم تقبلي بيها لأنك لو مرضتيش هتعملي إيه هتغيري حاجة أنتي اللي هتتعبي، سلمت أمري لله والنهاردة بقول الحمد لله إني مخلفتش علشان الحياة دلوقتي مش زي الحياة زمان وظروف دلوقتي مش زي زمان القهرة بتاعة دلوقي بقت صعبة أوي'.

وتحدثت عن يسرا عن زيحتها الأولى وقرار الانفصال وقالت: 'قرار أخدته وأنا مقتنعة تماما إني صح، وعرفت بعد كده إني كنت صح، في ستات بتخاف تقول 'لأ' عشان متدفعش التمن، لكن في ستات لازم تبقى عارفة أمتى تقول 'لأ' ممكن متقولش 'لأ' طول عمرها لكن تيجي في لحظة لازم تقولها، ودا لما حقها يهدر تماما، مش كل حاجة تقف عليها الست في ستات نكدية، لكن في ستات حقانية وفاهمة أمتى تطلب حقها صح ودول أنا معاهم'.

وتابعت يسرا: 'أنا قلت لأ كتير واتكسر قلبي زمان، لكن دلوقتي خلاص'.

على جانب آخر، يعرض ليسرا في دور العرض السينمائية فيلم 'الست لما'.

فيلم 'الست لما' يشارك في بطولته إلى جانب يسرا كل من: ماجد المصري، ياسمين رئيس، درة، عمرو عبدالجليل، انتصار، دنيا سامي، رانيا منصور، محمد جمعة، محمود البزاوي، محمد أنور، وعدد من ضيوف الشرف، والعمل من إنتاج ندى السبكي ورنا السبكي، وإخراج خالد أبو غريب، تأليف كيرو أيمن ومصطفى بدوي.