تحدث الفنان هشام عباس عن كواليس اختيار اسمه الفني، وسبب رفض اسم 'هشام عباس' في البداية، كما أعلن عن اسمه الحقيقي الذي لا يعرفه أحد.

قال هشام عباس في حوار مع الإعلامية شيرين سليمان ببرنامج 'سبوت لايت': 'اسمي الحقيقي محمد هشام، وهو اسم مركب'.

وعن قصة هذا الاسم المركب قال: 'جدي كان عايز يسميني محمد ومامتي كانت عايزة تسميني هشام، فبابا محبش يزعل حد منهم فسماني محمد هشام'.

وأضاف: في المدرسة كانوا بيقولوا محمد هشام راح ومحمد هشام جه، أما في الجامعة فكان ناس تندهلي محمد وناس تندهلي هشام.

واستطرد هشام عباس: لما جيت أغني قالولي مش هينفع محمد هشام، لأن في محمد محيي ومحمد الحلو ومحمد منير ومحمد فؤاد، واسم محمد كتير قوي.

وأكمل: كانوا عايزين يسموني 'هشام المصري'، ولما شوفت الاسم على ألبوم سيمون كنت وقتها مهندس صوت، استغربت الاسم جدًا وقلت لهم مين هشام المصري ده؟

وواصل: طلبت أن يكون اسمي هشام عباس، فقالوا لي 'عباس' بلدي قوي، قلت لهم يعني عمرو دياب 'دياب' ده اللي شيك يعني؟