أكد الفنان نبيل نور الدين أنه اختار أن يعيش في دار إقامة كبار الفنانين رغم معارضة أسرته في البداية، وأن ما يكتب عنه في مواقع التواصل الاجتماعي غير صحيح.

وحكى نبيل نور الدين خلال لقائه مع إسعاد يونس في برنامجها 'صاحبة السعادة' متى قرر البقاء في الدار وقال: 'لما عملت الحادثة ووقعت في الشارع وأغمى عليا ودخلت مستشفى وكلمت دكتور أشرف زكي وبعتلي ناس نقلوني لمستشفى تانية قعدت فترة وسألت عن موضوع الدار بتاع الفنانين مكنتش أعرفه قالولي أن فيها كل حاجة وفيها رعاية وأطباء عشان اتعالج'.

وتابع نبيل نور الدين: 'أهلي كلهم مكانوش موافقين وقالولي مينفعش وإحنا موجودين، أنا قلت الأول أجي أشوف الدار ولقيته حاجة عبقرية فأنا أروح أضايقهم ليه ما أجي هنا، أنا مقتدر وعندي اللي يعيشني مدى الحياة الحمد لله، بس ليه مقعدش مع زملائي وأكل وشرب وحمام سباحة وعلاج طبيعي كل شيء موجود، إيه اللي يخليني أروح أضايق إخواتي أو حد'.

ورد نبيل نور الدين على ما يكتب عبر مواقع التواصل الاجتماعي وقال: 'السوشيال ميديا بتتكلم علينا كأننا يا عيني أهلهم سايبينهم ومحدش واخدهم، يا جماعة عيب أنا ممكن أروح أي مكان يعجبني مش محتاج أنا هنا وسط زملائي بتعالج'.

وكشف نبيل نور الدين عن حالته الصحية وقال: 'عيني مبقتش بشوف كويس وبتأسف لكل الناس اللي بيبعتولي ومبعرفش أرد عليهم والله ما بشوف الموبايل وللأسف مفيش علاج لأن في بؤرة سوداء على الشبكية في العينتين فمبقتش أشوف'.

وأوضح نبيل نور الدين أن بسبب حالته الصحية لم يعد يعمل وقال: 'بطلت اشتغل من سنتين، جالي السنة اللي فاتت مسلسل بتاع نيللي كريم واعتذرت لأن إحنا متعودين على أيامنا النص بيبقى معايا واقرأ واحفظ لكن دلوقتي هجيب حد يحفظني صعبة أوي'.

يذكر أن آخر أعمال نبيل نور الدين في رمضان 2024 بمسلسل 'صلة رحم' تكون من 15 حلقة.