حلت الفنانة هند عبد الحليم ضيفة على برنامج 'آرتيستيك' الذي تقدمه ليلى بدران عبر محطة 'راديو هيتس' الإذاعية'.

وخلال الحلقة صرحت هند عبد الحليم عن الكثير من أحلامها وطموحها من صغرها، وبعض من آرائها في الأمور المختلفة، ومن أبرز تصريحاتها:

*في حاجات كتير الناس متعرفهاش عني، زي حبي للغناء والمسرح من وأنا صغيرة، وسعيدة إني بحقق أحلامي المؤجلة وبقيت حاليا ممثلة ومغنية، وبحب الأتنين جدا، وبحب أرقص، وبحب كمان كل ما له علاقة بالفن.

*كان عندي ٥ سنين لما روحت قلت لماما إني بعرف أعزف، وأول ما بابا رجع من السفر جاب لي أورج هدية عيد ميلادي.

*كنت بحب أغني من وأنا صغيرة، واكتشفت عندي ملكة اني بعرف أحفظ وأغني الأغاني علي طول، والدتي كانت بتستغرب لما تشغل الأغنية وأحفظها بسرعة وأغني معاها.

*بدايتي كانت في المسرح، وكانت أول مسرحية ليا بعنوان 'هنا أنتيجون'، وأخدت عنها جائزة أحسن ممثلة في المهرجان القومي للمسرح المصري، جائزة مش سهلة وممتنة جدا لأنها حصلت وكانت محطة مهمة من أهم الإنجازات في حياتي.

*بحب المسرح أوي، وبحس فيه إني بتنفس، وطايرة ومبسوطة وعندي طاقة، وده أحلى إحساس في الدنيا.

* عشقي للفن خلاني أدرس في المعهد العالي للفنون المسرحية، قسم تمثيل وإخراج.

*اتعلمت من المسرح المسؤولية والالتزام، والتمثيل قدام الجمهور تحدي كبير أوي، خصوصا لو بنمثل باللغة العربية والغناء لايف، وكل حاجة لازم تبقى بالمسطرة.

*في أيام كنت ببقي في الكواليس عندي برد، لكن أول ما بطلع المسرح بكون شخص تاني ولا كأني تعبانة، طاقة كده ما كنتش بعرف بتيجي منين.

*أول مسلسل ليا كان 'الكابوس' مع النجمة غادة عبد الرازق، وكان دوري مشهدين، وكنت خايفة أوي، بس هي كانت داعمة ليا، لحد ما اتعلمت واكتسبت خبرات.

*اشتغلت مع النجمة يسرا في مسلسل 'فوق مستوي الشبهات'، وكان ليا الشرف اني أشتغل مع النجوم اللي فيه بقيادة المخرج هاني خليفة، اللي علمني كتير في المشروع ده.

*التعاون مع الموسيقار هاني شنودة محطة مهمة أوي في حياتي، وليا الشرف إني طلعت من عنده متعلمة حاجات كتير، ولو سمع الأغاني الجديدة بتاعاتي كانت هتعجبه.

أغنية 'إزاي كده' أنا اللى كاتبة كلماتها وألحاني، والتوزيع مع هادز، ولولاه ما كانتش الأغنية هتطلع للنور.

*د. إيمان يونس علمتني حاجات كتير في الـ Vocalis والغناء

*استخدام الـ AI بيخوفني، لأن في ناس ممكن تستخدمه بطريقة مش صح، ما عنديش مشكلة نلجأ له في فكرة أو مثلا لو عطلانين في حاجة، لكن مش لدرجة استبدال البشر

*البنى ادم ربنا خلقه عشان يبتكر ويعمل حاجات، ولما الـ AI يعمل كل حاجة، يبقي الإنسان عايش ليه؟!

*ممكن تشوفوني قريب في حفلة وعايزة أجرب الـتفاعل هيبقى شكله إيه مع الأغاني الجديدة.

*تجربة دويتو 'صحاب الليل' مع عبد الرحمن رشدي كانت مهمة أوي بالنسبة لي، لأن هي اللي خلقت جوايا بداية احتراف الغناء، كمان عبد الرحمن رشدي فنان فظيع، وبعتبره أخويا وصديقي وفنان موهوب لأبعد الحدود.

*أغنية 'من أنا' اللي نزلت مؤخرا هي تجربة مختلفة غنيت فيها باللغة العربية مع موسيقى إلكترونية، والكلام كان مكتوب من سنتين تأليف سيف الخوانكي، والموسيقى والألحان محمد عامر.

*عايزة أعمل الأيام الجاية حاجات كتير، حفلات وألبوم غنائي وسينما، وحابة استكشف وأجرب، لأنها رحلتي وأتمنى الشغل يعجب الناس، وألاقي الحاجة اللى لايقة عليا والناس تحبنى فيها.

حاليا عندي ٤ أغاني، وممكن قريب يبقي فيه مينى ألبوم.