كشفت زينب حسن، والدة الفنانة رنا رئيس تفاصيل حالتها الصحية، وسبب نقلها للمستشفى خلال الساعات الماضية.

وقالت والدة رنا رئيس في مداخلة مع برنامج 'الستات' المذاع عبر قناة النهار، من تقديم الإعلاميتين مفيدة شيحة وسهير جودة: 'رنا الإجهاض حصل من 3 شهور ومن بعده كانت دايما تعبانة وعندها نزيف، وكنا بنروح لدكتور ونتابع. وفجأة من 5 أيام عندها مغص جامد وتعب لا يحتمل، والمسكنات مش نافعة، وابتدوا يدوها مخدر علشان تقدر تتحمل'.

وأضافت والدة رنا رئيس: 'الدكتور طلب 4D وقال فورا لازم تعمل منظار لأن حالتها مش طبيعية، وكانت في حالة خطرة ولقى النزيف واصل لغاية الكبد والطحال ومؤثر على المبيض وفي التواء، وطلعنا من العمليات بعد 6 ساعات'.

ومن جانبه، كشف سامح حسين الطبيب المسئول عن حالة رنا رئيس المزيد من التفاصيل عن حالتها قائلا: 'إمبارح الظهر راحت لاستشاري النساء والتوليد والأشعة وعمل لها سونار، وكلمني وقال إن في اشتباه في التواء في المبيض ونزيف داخلي، وجت فورا على المستشفى وعملنا لها التحاليل اللازمة، وكان في فعلا ألم وتجمع دموي في البطن، وقررنا نعمل منظار واستعنا بفريق الجراحة العامة'.

وأضاف طبيب رنا رئيس: 'المنظار أظهر إن في نزيف داخلي في منطقة الحوض واصل لأسفل الكبد، ومكانش في التواء في المبيض كان كيس دموي على المبيض وانفجر وعمل نزيف داخلي، وقدرنا نتعامل مع النزيف، ودكتور الجراحة اطمن على الأمعاء إن مفيش نزيف آخر، وهي دلوقتي تحت الملاحظة الدقيقة بعد العملية لمدة 48 ساعة، وممكن تخرج بعد بكرا'.

وردا على سؤال هل ستواجه رنا رئيس مشكلة في الإنجاب مستقبلا، قال الطبيب سامح حسين: 'إن شاء الله مفيش مشاكل'.