لفتت شخصية 'أيمن' في مسلسل 'عايشة الدور' الأنظار، هو الشاب الخجول الطيب الذي يعرف سر 'عايشة' ويساعدها.

البعض لم يكن يعرف من الشاب الذي قدم دور 'أيمن' وهو الفنان أحمد عصام السيد، الذي تواصل FilFan.com معه ليحدثنا عن الدور وكواليس العمل مع دنيا سمير غانم وغيرها من الأمور.

في البداية تحدثنا مع أحمد عصام السيد حول كيفية حصوله على الدور وتحضيراته له وقال: 'روحت عملت اختبار مع أستاذ أحمد الجندي واختارني للدور، 'أيمن' شبهي في سن من السنين بشكل كبير وشبه ناس كتير كنت أعرفها وكنت بشوفهم في المدرسة يعني أخدت من نفسي ومن أصحابي، حركة الإيد اللي بيعملها 'أيمن' أنا كنت بعملها وأنا صغير كتير وواحد صاحبي بيعملها لسه لحد دلوقتي دا كان عامل مساعد أن ألاقي 'أيمن' بيها.

أغلب مشاهد 'أيمن' مع 'عايشة' أو دنيا سمير غانم وحدثنا عنها في الكواليس قائلا: 'أستاذة دنيا سمير غانم أطيب حد في العالم ومحترفة جدا وبتحب التمثيل وبتحب تقعد تراجع المشهد كتير لحد ما نبقى مستريحين قبل التصوير، وبتساعد كل اللي حواليها وبتدي مساحة للممثل اللي قدامها ودا خلق الكيميا بينا، هي عالمية وأنا مش مصدق إني واقف قدامها'.

كما عبر أحمد عصام السيد عن سعادته بالعمل مع المخرج أحمد الجندي وقال: 'أنا طول الوقت بقعد جنب أستاذ أحمد الجندي أراقبه وهو بيخرج وأسئلة كتير لأن أنا خريج إخراج ولا زلت عايز أخرج، بفضل أسأل عن كل حاجة وهو شخص معطاء جدا لو حد سأله عايز نصيحة بيقول، والشغل ماشي من غير دلع ولكن بطريقة لطيفة ومرحة وبجو هادي جدا، نعمة من عند ربنا إني بشتغل معاهم'.

وعن ردود الفعل التي تلقاها عن دوره في المسلسل قال: 'الناس مسميني أبو نضارة، وبيقولوا عليا إني كويس، أنا مبسوط ومخضوض في نفس الوقت لأنها مسئولية كبيرة'.

واحد من المشاهد التي لاقت تفاعلا مع الجمهور مشهد يقوم فيه 'أيمن' بتعليم 'عايشة' لغة جيل GEN Z ومنها جملة 'خطيرة' وحكى أحمد عصام السيد عن هذا المشهد: 'جملة 'خطيرة' وحركة الإيد فكرت فيها مع سلمى ماهر مراتي، إحنا الإتنين كنا بنشتغل في الإعلانات وكان معانا شباب Gen Z، ففتكرنا الحاجات اللي كانوا بيعملوها، فـ'خطيرة' وحركة الإيد فكرة مراتي سلمى اقترحتها عليهم ونفذناها'.

وعن أصعب المشاهد قال: 'المسلسل كله كان تحدي مفيش مشهد صعب ومشهد سهل، بس بيئة العمل هي اللي خلت كل حاجة تكون سهلة والتوتر اللي عند أي حد يهدى ويكون مرتاح وهو بيشتغل'.

وعن أكثر المشاهد التي يحبها قال أحمد عصام السيد: 'أي مشهد أنا فيه مع مازو الليثي وأميرة وفرح وفاضل بنقعد نهزر ونضحك كتير في الكواليس وبنهون على بعض لو حد عنده مشهد مهم بنشجعه ونراجع سوا ولو حد عنده مشهد كوميدي نفكر سوا، مشاهد الجامعة اللي معظمنا موجودين في اللوكيشن من أمتع الحاجات'.

ولأن أحمد عصام السيد من عائلة فنية والدته الفنانة حنان يوسف ووالده المخرج عصام السيد سألناه عن رأيهما في أدائه وقال: 'المسلسل عاجبهم جدا وعاجب ماما أو وقالتلي إني صعبت عليها وأنها حبت شخصية 'أيمن' جدا، ووالدي الحمد لله الشغل عجبه، هما أول ناس بسمع رأيهم بعد الحلقة كوالدي ووالدتي مش ناس متخصصين في المجال، وهما الحمد لله مبسوطين بالمسلسل'.

كانت بداية أحمد عصام السيد 'ستاند أب كوميدي' وهذا العام في رمضان لمع أكثر من 'ستاند أب' خلال الموسم وعن هذا الأمر قال: 'الستاند أب حاجة والتمثيل حاجة مختلفة تماما، أنا فخور ومحظوظ أن حواليا أصحابي كانوا 'ستاند أب كوميدي' وموجودين في أعمال في رمضان عشان نقدر نتشارك التجارب سوا دايما بنتواصل مع بعض وبنقول آراء صريحة لبعض'.

وتابع: 'ناس كتير فاكرة أن عشان يمثلوا يبدأوا 'ستاند أب كوميدي' ودا غلط، العامل المشترك ما بين كل الشباب اللي طلعوا أن هما لما دخلوا الـ'ستاند أب' كانوا داخلين عشان حبهم ليه مش كخطوة توصلهم للتمثيل، بشوف ناس بتقول عايزة تبدأ 'ستاند أب' عشان تمثل نفسي أنصحهم أن أبدا 'ستاند أب' لو أنت بتحبه هو عالم ليه قواعده وصعوباته وحلاوته استمتع بيها لازم يكون عندك شغف ليه'.

ومسلسل 'عايشة الدور' ليس أول عمل لأحمد عصام السيد سبق ذلك مشاركته في فيلم 'آل شنب' وحدثنا عن هذه التجربة قائلا: 'فيلم 'آل شنب' بالنسبة ليا كان يخض إني داخل موقع تصوير أول مرة أمثل بطريقة بروفيشنال مش أفلام قصيرة، ومع أساطير ولكن الاحتضان كان موجود جدا وكان نعمة من ربنا أن حسن مالك ونورين أبو سعدة كانوا معايا فالموضوع كان لطيف جدا'.

وعن جديده قال: 'عندي مسلسل 'كتالوج' تأليف أيمن وتار وإخراج أستاذ وليد الحلفاوي وبطولة محمد فراج، اتوقع ينزل قريب على نتفليكس ويارب يعجب الناس، عندي حاجات بس لسه مقدرش أتكلم عنها'.

إلى جانب التمثيل يحلم أحمد عصام السيد أن يكون مخرجا وقال لنا: 'أنا خريج معهد السينما قسم إخراج، حلم الإخراج لحد دلوقتي موجود وأنا بمثل أي حاجة بحب أقعد جنب المخرج أتعلم وأراقب من بعيد وبفكر في المشاريع اللي عايز أعملها وبذاكر إخراج لحد دلوقتي'.