واصل الفنان تامر حسني تقديم رسائله التحفيزية لجمهوره، إذ شارك عبر حسابه الرسمي على موقع 'إنستغرام' مقطعًا من فيلم كرتوني يتناول فكرة مواجهة المستحيل، مؤكدًا أن الإيمان بالنفس والشعور بالدعم يمنح الإنسان القدرة على تحقيق ما يبدو بعيد المنال.

تفسير الرسالة ومعنى 'المشي على الهواء'

أرفق حسني الفيديو بتعليق قال فيه: قد إيه ده فيديو عظيم، كلنا لما بنفكر ناخد خطوة للأمام أو خطوة جديدة للنجاح مش بنبقى عارفين هننجح ولا لأ، بس بنحسبها صح ونحضر لها صح مع الناس الصح في التوقيت الصح، هيبقى فاضل أهم حاجة وهي إيمانك بالخطوة وحبك وشغفك الخارق ليها.

وأوضح أن المشهد الذي يظهر فيه الطفل وكأنه يمشي في الهواء يرمز للأحلام المستحيلة التي يمكن أن تتحقق بالثقة بالنفس، وليس للمشي على الهواء بمعناه الحرفي.

أهمية تجاوز الماضي

تابع حسني حديثه محذرًا من الانشغال بالماضي: الأهم إن في ناس كتير تفكيرها في الماضي بيعطلها، على طول بتبص وراها وآديكوا شوفتوا لما الولد بص وراه وقع. الماضي عدى خلاص، ومحدش يقدر يمشي لقدام وهو باصص وراه، لازم يقع أو يخبط في حاجة تعطلّه.

التركيز على الحاضر

أكد الفنان أن الحاضر هو مفتاح النجاح الحقيقي، قائلًا: ركز في الحاضر عشان ده بس اللي ملكك، وهو ده الوقت اللي لو حبيته هيحبك ويقف معاك ويساعدك تجري بأسرع ما يمكن.. حب حاضرك رغم أي مشاكل فيه واتحدى صعوباته. خد حالاً أحلى قرار ينجحك، محدش هينفعك غير مجهودك وسعيك ومتبصش وراك أرجوك.. نهاركم كله خير.

دعمه للمواهب الشابة

لم تكن هذه المرة الأولى التي يتحدث فيها تامر حسني عن مسيرة النجاح، إذ سبق وكشف في تصريحات سابقة عن معاناته في بداياته الفنية، مؤكدًا حرصه على دعم الشباب: أنا تعبت جدًا في بدايتي ولو أقدر أساعد حد هساعده، بحاول بقدر الإمكان أدعم المواهب الشابة مش لازم حد يتمرمط ويشوف اللي أنا شوفتُه، واتعلمت ده من والدتي لأنها كانت تجبر بخاطر الكل'.

مواجهة التعليقات السلبية

كما تطرق حسني إلى خطورة التعليقات السلبية وتأثيرها في الإنسان، موضحًا: 'للأسف في حاجات كتير بتحصل بسبب كلمة وحشة ممكن تموت بني آدم، وأنا كفنان ياما سمعت لكني اتمرنت أتعامل، أما الإنسان الطبيعي فعلًا بيتأثر، وبطلب من الناس يتمرنوا إزاي يحولوا الطاقة السلبية لطاقة إيجابية'.