تحدث الفنان محمود عزب عن كواليس مسلسل 'الست موناليزا' وتدخل المخرج محمد سامي لإنقاذ الموقف بعد تأخر تسليم حلقات المسلسل.

قال محمود عزب: 'مسلسل 'الست موناليزا' ليه ظروف محصلتش في أي مسلسل قبل كدة، كان معروض عليا مسلسل آخر ولكن كان دوري مافيهوش تمثيل كنت بقول معلومة، وكلمني أستاذ محمد علي المخرج وقالي أن دوري مش هقول حاجة، الموضوع استهواني جدا حاجة محصلتش، الرجل المشلول دا شريحة موجودة في بيوت كتير جدا، وبتحصل أحداث وهو مالوش أي تدخل وبتحصل احداث ومابيرجعلوش ومابيعتنوش برأيه ولا وجهة نظره'، حسب تصريحاته لبرنامج 'أسرار' الذي تقدمه أميرة بدر.

وتابع محمود عزب: أول حاجة عملتها جبت مخرج مسرحي يقرالي الممثلين بيقولوا ايه وانا بحلم بردود افعالي، لازم ابقى قاري وواعي للكلام اللي بيقولوه، وكان محمد علي متفق معايا إن في نهاية المسلسل هطلع إن أنا اللي علمتهم الشر، وواحنا شغالين قالي مش عايز اطلعه كدة، الابلسة في الست نفسها، واتكلمنا مع بعض إن هننهي الحكاية بان ابني الصغير هيوديني الشقة تانية ونستعرض التغيرات اللي بتحصل للرجل دا، لابس روب كويس وابنه جب له نضارة وساعة ومسند للمصحف، إلى جانب إني اشترك في مشهد المحكمة وبرغم أن ابني ومراتي قاسيين وانا مش راضي ولكني قولت كلمة واحدة بس 'يارب' إني زعلان عليهم، لأنه ابني مهما كان.

وأضاف محمود عزب: عن سبب عن ظهور النهاية كما متفق عليها، قال محمود عزب: محمد سامي مخرج مافيش بعد كدة، حد جامد في منطقته جدا، وبالتأكيد أستاذ محمد سامي قابل أستاذ محمد علي لأنه هيخرج مسلسل لمراته، وأضاف للحكاية وتناقش فيها وساب للاستاذ محمد علي إنه يخرج، وابتدينا نحس ان مافيش انتاج يومي المفروض مثلا نطلع صافي 10 دقائق في اليوم بقينا نطلع 3 دقائق، وأنا اتعذبت جدا في المسلسل دا لإني قاعد مستني المشهد اللي انا فيه، ولما جيه استاذ محمد سامي شاف ان المسلسل كدة مش هيخلص، فطبعا يهمه مراته جدا، وهو حقه، وتدخل بشكل كبير لأن تقريبا 3 وحدات بـ3 مخرجين غير محمد سامي اللي كان موجود عند المونتاج ويأمر ويعيد مشاهد، وعدت 3 مشاهد لنفسي، ولو مكنش اتدخل مكنش هيتلم، كنا عاملين 20% وفاضل لنا 80% وفاضل 10 أيام! لذلك تدخل حماية لمراته، وخد معه محمد علي في المونتاج، وبسبب التأخير دا مشاهدي في النهاية محصلتش.

تدور قصة مسلسل 'الست موناليزا' حول 'موناليزا' الفتاة البسيطة التي تعيش في الإسماعيلية، تتزوج من 'حسن' جارها القديم وتكتشف أنه كان يخدعها ويسرق كل ما معها من أموال، وبالخطأ تقتل 'موناليزا' شقيقة 'حسن' وتدخل إلى السجن لمدة عام، وهناك تتعرف على سيدة تدعى 'عفاف' تقف بجانبها وتعرفها على شقيقها الذي يتزوج بـ'موناليزا' بعد خروجها من السجن، لكن في النهاية يتضح أن كل هذا بالاتفاق مع 'حسن' للاستيلاء على قطعة أرض ورثتها 'موناليزا' عن والدها.

مسلسل 'الست موناليزا' يشارك في بطولته إلى جانب مي عمر كل من: محمد محمود، هدير عبد الناصر، سلوى محمد علي، شيماء سيف، إنجي المقدم، سوسن بدر، أحمد مجدي، حازم إيهاب، جوري بكر، مصطفى عماد، محمود عزب، حسن حفني، والمسلسل من تأليف محمد سيد بشير، وتحت قيادة المخرج محمد علي.

بيتر ميمي يرد على كابتن إيلا بعد تعليقها على مسلسل 'صحاب الأرض'