استعاد الفنان حسين فهمي ذكرياته مع فيلم 'موعد على العشاء' للمخرج محمد خان وبطولة سعاد حسني وأحمد زكي.

وخلال ندوة 'رجال محمد خان: أبطال خارج المألوف' في مهرجان الجونة السينمائي حكى حسين فهمي عن موقف طريف خلال تصوير الفيلم.

وقال حسين فهمي: 'كان في مشهد أنا قاعد في البيت مستني سعاد حسني وهي جايه معاها أحمد زكي اشترت حاجات ودخلت جري على المطبخ وأحمد زكي نور النور لقاني فانسحب بهدوء، طلعت سعاد من المطبخ ماسكة رغيف عيش، فمحمد خان قالها لأ هتسيبي العيش جوا قالتله لأ أنا همسك العيش، قعدنا ساعتين نطلع بالعيش ولا لأ'.

وتابع حسين فهمي: 'اتفقنا في النهاية أن سعاد هتطلع برغيف العيش ورجعنا نكمل المشهد، طيب أحمد زكي راح فين؟ قالوا روح خلاص خلص المشهد، سعاد حسني قالت لازم يرجع، ليه يا مدام سعاد لأن لازم اسمع خطواته عشان يمشي طيب إحنا هنعمل الخطوات لا أحمد زكي ليه خطوات معينة لازم اسمعها'.

وأضاف حسين فهمي: 'كلموا أحمد زكي في البيت وقالوله عايزينك ترجع تاني، رجع أحمد زكي المساعد قاله اتفضل ألبس يا أستاذ قاله في حاجة ناقصة في المشهد؟ رجع لبس لبسه كله ودخل البلاتوه سأل فيه إيه قالوله عايزينك تمشي عشان نسمع صوت الجزمة، أحمد زكي خرج راح جاب المسدس من العربية ورجع عايز يقتل محمد خان وجري وراه في البلاتوه وأنا قاعد أحوش الفيلم اتعمل بمعجزة في الآخر'.

فيلم 'موعد مع العشاء' من بطولة سعاد حسني وأحمد زكي وحسين فهمي وزوزو ماضي ورجاء الجداوي وإنعام سالوسة، تأليف محمد خان وسيناريو وحوار بشير الديك وإخراج محمد خان.