كشفت الفنانة نادية الجندي عن أصعب الأعمال التي قدمتها خلال مشوارها الفني.

وأكدت نادية الجندي أن جميع أدوارها صعبة، لكن كان هناك بعض الأعمال التي تركت أثرا حتى بعد انتهاء التصوير.

وقالت نادية الجندي في لقاء مع 'عرب وود': 'أعمالي كلها بعتز بيها والحمد لله سواء الأعمال السياسية والوطنية، الأحب لقلبي 'الضائعة' و'مهمة في تل أبيب' و'الرغبة' دي الأدوار اللي كانت صعبة أوي ومعقدة لدرجة إني مرضت بعدها لأنها بتعتمد على المعاناة النفسية والصراعات بتفضل تأثيرها فترة بعد انتهاء العمل، في فيلم 'الضائعة' من كتر ما عيشت في مصحة مدمنين وشفت الحالات اللي بتحصلهم بعد الفيلم قعدت شهرين مريضة نفسيا، فيلم 'الرغبة' نفس الحكاية'.

وتابعت نادية الجندي: 'الناس في الشارع بتقابلني بتقولي هو إنتي كل أدوارك صعبة كده معندكيش دور سهل أبدا'.

وأكدت نادية الجندي أن الفنان لا بد أن يكون قدوة لجمهوره وقالت: 'الفنان لازم يبقى قدوة ودا جزء من عملي مينفعش إن أنا أعمل أدوار فيها أكشن ومجهود وفيها لياقة بدنية إلا لو كنت أنا جسمي مناسب وفي الشكل اللائق عشان احترم جمهوري فجمهوري يحترمني، ودا جزء من عملي بتدفع التمن إنك تحافظ على جسمك على طول تحرم نفسك من حاجات كتير'.

وعن طريقتها في الحفاظ على جمالها ولياقتها: 'أنا ست متصالحة مع نفسي معنديش غل ولا حقد والحمد لله حب الجمهور والنجاح اللي وصلتله وثقتي بنفسي وفي جمهوري وربنا قبل كل شيء دا بيخليني على طول في الحالة اللي ببقى فيها'.

يذكر أن نادية الجندي تم تكريمها في حفل افتتاح الدورة السادسة من مهرجان القاهرة للسينما الفرنكوفونية.