كشف النجم الكوميدي محمد أسامة 'أوس أوس' عن الموقف الذي كان سببا في تغيير نظرته للحياة.

وقال أوس أوس خلال حوراه مع الإعلامي معتز الدمرداش ببرنامج 'ضيفي' المذاع عبر قناة الشرق للأخبار: 'التجربة اللي غيرت حاجات كتير في تفكيري وفاة ابني وهو صغير. نظرتي للحياة كلها اتغيرت، وتحس إن أنا كبرت فيها 10 أو 20 سنة . خلاص خسرت أغلى حاجة، هتعمل إيه بالحاجات دي كلها؟ ولا حاجة'.

تحدث أوس أوس خلال اللقاء عن الإحباطات التي تعرض لها في بداية مشواره الفني قائلا: 'قبل 'مسرح مصر' بـ 4 أو 5 سنين أنا وكريم عفيفي جالنا مسلسل وفرحنا جدا، وكتبنا أدوارنا من حكايات في حياتنا. ساعتها مكناش نقابيين وطلع قرار من النقابة ومشونا من المسلسل'.

وأضاف: 'أول يوم عرض المسلسل اتفرجت أنا وكريم عليه في بيت علي ربيع وأنا بعيط. وربيع قال لنا أقسم بالله لنبقى نجوم مصر، وإحنا ولا حاجة'.

وردا على سؤال عن المرحلة التي بدأ يشعر فيها بثمار النجومية والشهرة، قال أوس أوس: 'في 'تياترو مصر' كنت لسه متجوز وقاعد في شقة إيجار، اسمي معروف بس بناخد أي كلام من المسرح، ومراتي كانت شغالة في بنك وبتقبض أكتر مني سابت الشغل وقعدت معايا'.

وتابع: 'لما رحنا 'مسرح مصر' الدنيا ابتدت تتظبط، وأشتري بيت وأعمل لها اللي نفسها فيه. لما مراتي اتبسطت وضحكت أنا نمت على المخدة مبسوط'.

ويشارك أوس أوس في بطولة فيلم '101 مطافي'، الذي لم يتحدد موعد عرضه حتى الآن.

الفيلم يشارك في بطولته أوس أوس، هدى الإتربي، محمد عبدالرحمن، عبدالرحمن ظاظا، إنتاج أحمد السبكي، تأليف ضياء محمد، وإخراج محمد أمين.