حكى الفنان أمير كرارة عن أزمة مر بها لفترة وحالة مرضية لم يجد لها علاج إلا من خلال الداعية مصطفى حسني.

وخلال لقائه في برنامج 'صاحبة السعادة' مع إسعاد يونس حكى أمير كرارة قائلا: 'حصلي موضوع من حوالي 6 أو 8 سنين فجأة أبقى دايخ فضلت لسنة ونص كده، وإيه السبب مش عارف في فترة كنت بصور حاجة والله كانوا بيحطولي كرسي عشان وأنا واقف اشتغل أبقى ساند عليه، دايخ ومش عارف السبب وفضلت تزيد طول ما أنا حاططها في دماغي وابتدى يبقى عندي فوبيا منها'.

وتابع أمير كرارة: 'رحت لأكتر من دكتور وعملت إشاعات على المخ وفي الآخر قالولي أنت مفيش حاجة، رحت لدكتور كبير هنا مخ وأعصاب وقالي أنا ليه مشدود، ورحت لدكتور كبير جدا عراقي وكان هيتجنن مني حجزت عنده بطلوع الروح وسافرت ليه وقعدت معاه وقالي أني كويس وإني سليم مليون في الميه، وأنا كنت عايز أنا عندي إيه، بعدها سافرت لدكتور تاني وقالي أن مفيش حاجة وأن عندي طريقين يا أخد أدوية أعيش عليها طول عمري يا أما لوحدي أطلع من الموضوع دا'.

وأكمل أمير كرارة: 'فضلت كده لحد ما في مرة كلمت مصطفى حسني وحكيت ليه إني بحس أن في حاجة مسكاني من قفايا، قالي هديك دواء هتاخده وتكلمني بعد شهر متكلمنيش قبليها راح مديني سبحة من عنده وقالي كل ما تحس أن الحالة دي بتجيلك قول '3000 لا إله إلا الله'، ومشيت من عنده بقى كل ما تجيلي الحالة أقول 'لا إله إلا الله' بعد شهر لقيت الحالة دي راح كلمته قالي أنت عارف الحالة راحت من عندك ليه عشان ألا بذكر الله تطمئن القلوب أنت كنت عيان في قلبك مش دماغك كنت محتاج تهدأ وتتطمن من بعدها لقيت أن الدواء الوحيد والحل الوحيد أن الواحد يبقى مع ربنا'.

يذكر أن أمير كرارة عرض له مؤخرا فيلم 'الشاطر' من تأليف أحمد الجندي وكريم يوسف، وإخراج أحمد الجندي وانتاج سينرجي فيلمز بالتعاون مع بيراميدز للانتاج الفني، بطولة هنا الزاهد ومصطفى غريب وعادل كرم وأحمد عصام السيد وخالد الصاوي.