حلت الفنانة السورية سوزان نجم الدين ضيفة على برنامج 'لمن يهمه الأمر' الذي تقدمه أميرة نور عبر راديو 'نغم FM'.

وخلال الحلقة، صرحت سوزان نجم الدين العديد من التصريحات حول أعمالها الفنية وجديدة، وكان أبرزها:

-أنا ست لسه بتعلم وبحب وبخاف وبقع وبحلم، ولسه عندي شغف البنت الصغيرة

-بدأت أعمل حاجات للناس عن التنمية البشرية، عشان حسيت الجمهور محتاج ده

-دراستي للهندسة ما خلتنيش بعيدة عن الفن، لأن الهندسة أم الفنون ومهنة المهندس المعماري زي الفن في إخراج شكل الحياة، واتعلمت إن البناء اللي مالوش أساس قوي بيقع من أقل هزة، وفي الفن بنبني تاريخ

-لو رجع بيا الزمن كنت أخدت نفس قرار شغلي في التمثيل وبحماس أكبر، وبالنسبة لي التمثيل لسه هواية عندي لغاية دلوقتي

-حسيت إني ممثلة من أول دور وقفت فيه قدام الكاميرا، ونسيت فيه إني سوزان لأن الشخصية اللي مثلتها طردت شخصيتي الحقيقية وعرفت وقتها إني ممثلة

-شهرتي جاءت بدري والأهم إنه جاء معاها الوعي، واستمديته من أهلي ودراستي وثقافتي، وحاولت أعمل توازن بين الفن وأسرتي وأولادي

-صديقتي الصدوقة هي نفسي، وبحب أرد عليها في معظم الأوقات، وبطبعي مش سريعة القرار وأوقات كتير بكون مترددة

-بعشق اللهجات الصعيدية والمصرية، ونفسي أعمل شخصية صعيدية أو شعبية، وساعتها هقدمها بشكل ما يتنسيش

-اعتذرت عن أدوار اسمهان وليلى مراد وهند رستم لضعف المستوى الفني، وما ينفعش أدخل دور لقامات كبيرة ويبقى المستوى الفني ضعيف

-كنت عايزة دوري في مسلسل 'ابن أصول' مع حمادة هلال ينجح أكتر من كده، وحمادة هلال مسالم وحبّوب وشخصية جدعة جدا ونفسي أشتغل معاه مرة تانية

-مؤمنة إن دور الأم بينتهي عموما عند سن الـ ٦ سنوات، لأن الطفل بيبقى زي السفنجة لحد العمر ده

-الدموع مش ضعف ومفيش أحلى من دموع الفرح، وأمتع حاجة في الدنيا لحظة الدموع اللي بتنزل وقت بكائي ومناجاتي لربنا

-بكيت دموع الفرح أول مرة لما جوزت بنتي

-تمن الشهرة اللي دفعته من حياتي كان الوقت، لأنه اكبر فاتورة ما بترجعش

-الرجل بالنسبة لي يعني المسؤولية والأمان والعطاء

-نفسي نفتح أبواب جديدة للنجوم الشابة، ونشوف الفنانين الحاليين في أنماط مختلفة

-بحضر حاليا لمسلسل ١٠ حلقات لرمضان الجاي إن شاء الله