أكدت المطربة الكبيرة نادية مصطفى على أهمية تكريم أمير الغناء العربي الراحل هاني شاكر في مهرجان الموسيقى العربية بدورته الـ 34.

وقالت نادية مصطفى في تصريحات خاصة لراديو النيل، على هامش فعاليات مهرجان الموسيقى العربية بدورته الـ 34: 'كل المطربين الموجودين على الساحة الغنائية، سواء في مصر أو الوطن العربي، كان لازم يكونوا موجودين للمشاركة في الاحتفاء بالفنان الكبير هاني شاكر، لأن اليوم ده بمثابة رد الجميل لفنان عظيم قدّم للساحة الغنائية أغانى حققت نجاحات استثنائية'.

وأضافت: 'حفل افتتاح مهرجان الموسيقى العربية شهد تقديم 20 أغنية من الأغاني الناجحة للفنان هاني شاكر، ولسه فيه أغانى كتير تستحق يتعمل لها حفلات، لأنها حققت نجاحات كبيرة وما كانتش مجرد أغنيات عابرة'.

وتابعت: 'إهداء الدورة الحالية من مهرجان الموسيقى العربية لروح الفنان هاني شاكر، هو أقل تقدير لقيمته وقامته الفنية العظيمة، وبشكر كل الفنانين اللي شاركوا في الاحتفاء بيه. لحد دلوقتي لما بيتقال اسم هاني شاكر، بحس إنه لسه موجود وسطنا بروحه الجميلة وضحكته الحلوة وحضوره اللي كان بيملى المسرح بهجة وفرح وطرب حقيقي، وربنا يرحمه'.

تحدثت نادية مصطفى عن تعاونها خلال مسيرتها مع أكبر الأسماء في عالم التلحين والغناء قائلة: 'بعتبر نفسي محظوظة إني اتعاملت خلال مسيرتي الفنية مع كبار المؤلفين والملحنين، منهم كمال الطويل، ومحمد سلطان، وبليغ حمدي، وعبد العظيم محمد، وعمار الشريعي، وكمان من الأجيال المتوسطة، زي سامي الحفناوي ومحمد ضياء، ووجود أغنيات ليا من ألحان وكلمات الاسماء العظيمة دي مصدر سعادة واعتزاز بالنسبة لي'.

وأضافت: 'أغنية «سلامات» من الأغنيات اللي بقالها سنين طويلة، لكنها لسه عايشة مع الجمهور، وبفضل ما أركزش في حساب السنين أو تواريخ الأغنيات، رغم إن أول سنة غنيت فيها في حياتي كانت سنة 1984. ومن الأغنيات اللي بحبها جدا «جاي في إيه» و«الصلح خير» و«استنى لما أمشي ما تقولهاليش في وشي»، للملحن محمد ضياء'.

واستعادت نادية مصطفى موقفا مع الراحل هاني شاكر قائلة: 'من المواقف اللي عمرى ما هنساها للفنان هاني شاكر، إنه أغنية «استنى لما أمشي ما تقولهاليش في وشي» من ألحان محمد ضياء كانت أغنيته ولما سمعها شاف إنها مناسبة لصوتي، فكلمني وطلب منى أسمعها، وبعد ما عجبتني الأغنية وباركت له عليها، قال لي إني أنا اللي أستحق التهنئة لأنه شايف الأغنية مناسبة لصوتي، وده بيعكس مدى كرمه وحبه للي حواليه'.

كما تطرق الحوار إلى الحياة الشخصية للمطربة نادية مصطفى حيث قالت: 'ارتباطي بالفنان أركان فؤاد كان داعم جدا ليا في حياتى الفنية، وبنصح كل امرأة إنها تختار شريك حياة يكون مجاله قريب من مجالها، عشان يكون بينهم لغة مشتركة وتفاهم لطبيعة الشغل'.

وتابعت: 'وجود فنانين في بيت واحد بيساعد على تفهّم طبيعة العمل ومتطلباته، وبيخلي كل طرف يقدّر ظروف الطرف التاني، خصوصًا في أوقات الانشغال بالعمل، من غير ما تتحول المسؤوليات اليومية في البيت إلى مصدر للخلاف'.

وأكملت: 'الفنان أركان فؤاد كان السند القوي ليا من بداية مسيرتي الفنية، ورغم إنى كنت رافضة فكرة الجواز في البداية عشان كنت خايفة يعطلني عن مشواري الفني، لكن هو وعدني إنه هيساندنى ويدعمنى، وكان قد وعده'.

وتحدثت نادية مصطفى عن نصيحتها لابنتها فيروز بقولها: 'نصحت بنتى الفنانة فيروز أركان في بداية مشوارها الفني بالاعتماد على صوتها وموهبتها، لأن صوتها جميل ويستحق إن الجمهور يركز معاه، بدل الاعتماد على المظهر أو أي عوامل تانية بعيدة عن الغناء'.

وواصلت: 'كل فنانة عندها موهبة صوتية جميلة لازم تحافظ عليها وتعتمد على صوتها، وما تضيعش جمال الموهبة اللي ربنا وهبها ليها بالتركيز على حاجات تانية'.

وحول أعمالها القادمة قالت: 'الملحن محمد ضياء بيجهز لي عمل غنائي جديد، وكنت لسه عنده قريب، بعمل أغنية لهاني شاكر، من كلمات مؤلف من محبي هانى شاكر، وملحن من فانز هانى، وكان المفروض أقدمها في حفل افتتاح مهرجان الموسيقى العربية، لكن للأسف ملحقناش نخلصها، ومجرد الانتهاء من تنفيذها هيتم طرحها للجمهور'.

حرب نجوم #رمضان بدأت بدري قوي ... قصف الجبهة اشتغل بين محمد رمضان وأحمد العوضي ????

#عشماوي #سلطان_الديب https://t.co/ub6Wv3DL8l