اشتعلت مواقع التواصل الاجتماعي خلال الساعات الماضية بعد منشور هجومي جديد من الكاتب والسيناريست محمد صلاح العزب ضد الشاعر أيمن بهجت قمر، وذلك في تصعيد مباشر بعد خلاف بين الطرفين بدأ بانتقاد العزب لكلمات بعض أغاني الفنان عمرو دياب، ورد عليه قمر بأسلوب أثار استياء العزب، ليقرر الأخير الرد بمنشور مطوّل احتوى على هجوم حاد وسخرية لاذعة.

خلاف محمد صلاح العزب وأيمن بهجت قمر

بدأ العزب منشوره عبر 'فيسبوك' بتوضيح نبرة عامة قال فيها: فيما يتعلق بموضوع كلمات ألبوم عمرو دياب، عشان في مواقع كتير ناشرة كلام محصلش، أنا راجل مسالم لا بحب الخناق ولا وجع القلب، وده آخر كلام هقوله في الموضوع ده ما لم يجد جديد.

وأوضح العزب أنه كتب رأيًا على صفحته الشخصية التي يديرها بحرية تامة: كتبت على صفحتي الخاصة اللي مشتريها بفلوسي وبدفع النت بتاعها على حسابي، رأيي المتعلق بذوقي، اللي هو بتاعي ويخصني، إني مش عاجبني بعض كلمات أغاني ألبوم عمرو دياب. ما أنا حر يا عم، لا جبت سيرة حد بالاسم، ولا قلت كل الأغاني، مع إنه برضه عادي.

'أيمن بهجت قمر.. البطحة وجعته!'

وواصل العزب مهاجمًا: الزميل اللي ليه كل احترام وتقدير، الأستاذ أيمن بهجت قمر، البطحة وجعته تقريبًا، فاتنحرر، رغم أنه مجرد شاعر من وسط 10 شعراء كبار مثلًا في الألبوم، ودخل يقولي ما إحنا بنتفرج على مسلسلات سطحية ومبنتكلمش! اللي هو انت برضه لما تلاقي زمايلك عاملين حاجات سطحية متتكلمش؟

وأكد العزب أنه لا ينزعج من الانتقاد، وقال: أنا يا سيدي مبتضايقش لما حد بينتقد شغلي، وعمري ما رديت على حد قال شغلك حلو ولا وحش، ويا ما اتقال حلو واتقال وحش، ودي طبيعة الشغلانة.

ثم كشف مفارقة في موقف قمر قائلاً: كمان صحيح، المسلسلات بتاعتي اللي مش عاجبة الأستاذ، هو اللي كاتب لها أغاني التترات أساسًا، بس هو اكتشف إنها كخة دلوقتي! عشان التترات دي نحتاية ع السريع كده، مش لازم يعرف المسلسل ده حلو ولا وحش قبل ما يقرر يشارك فيه... المهم الشيك.

هجوم ناري على أرشيف أيمن بهجت قمر الفني

سخر العزب من عدد من أعمال قمر الفنية قائلًا: وأكيد يا عم أيمن، واحد زيك عنده توليفة فاخرة من الأعمال الساذجة، من أول مسلسليكو، وليالي الحلمية 6 اللي أكيد معذب أسامة أنور عكاشة في تربته، وقنبلة الضحك عنتر ابن ابن شداد، لحد فلانتينو، وأهل الكهف، والهنا اللي أنا فيه، وغيره وغيره! ده شغله ودي دماغه، ما يسكت، وما يتكلمش عن العمق خالص... مش لايق يعني.

وكشف العزب عن خلفية شخصية بينه وبين بهجت قمر، قائلًا: الأستاذ المبجل ده كان عندي على فيسبوك ضمن الأصدقاء، ومسحته من سنة ونص ولا حاجة عشان نفس الفكرة والشخصية المهزوزة، وإنه قموصة، كل ما حد ينتقد شغله من الجمهور يقعد يتخانق معاه. والواحد ماعندوش مرارة زيادة يقعد يتفرج على الهم ده، فمسحته في صمت وخلصنا.

واختتم العزب منشوره بتعليق ساخر على إحدى كلمات الأغاني قائلًا: بالمناسبة، انت حسيت صح... هو في حاجة في 2025 اسمها رماني في شبكة وعيوني ارتبكوا؟ يا راجل؟ مش كده!

وأضاف: وآخر نصيحة من صديق فيسبوك قديم: اشتغل أقل بجودة أكبر، عشان هي مش مسابقة على لقب شيخ النحاتين.

منشور أول أشعل الخلاف

كانت بداية الأزمة، عندما نشر العزب تدوينة عبر حسابه الرسمي، انتقد خلالها كلمات بعض أغاني عمرو دياب، دون ذكر أسماء، وكتب ساخرًا: سيبك من الألحان والتوزيع والمزيكا والطبل والزمر والهيصة وعمرو دياب وتريند وفرحة الصيف وأنا مهما كبرت صغير... ادخل على اليوتيوب، واقرأ الكلام اللي مكتوب تحت كل أغنية، كده راجل لراجل، من غير دوشة أو غلوشة.

وأضاف: المفروض إن الكلام ده هو زبدة الزبد، وعصارة آلاف السنين من الشعر العربي والغنائي، وتجارب الحب والخذلان والفرح واللوعة... لكن لما تيجي تبص، مش هتلاقي لا صورة، ولا إحساس، ولا حتى جملة واحدة تعلق.

أيمن بهجت قمر يرد: راجع شغلك

جاء الرد سريعًا من أيمن بهجت قمر عبر تعليق قال فيه: إحنا كمان بنشوف مسلسلات مملة وبتتذاع وبتتنسي، وبنسكت وبنحترم زمايلنا رغم اختلاف أعمالهم، فأقترح تراجع شغلك قبل ما تنظّر على ناس بتتعب وبتقدّم أعمال محترمة.