كشف المايسترو سعيد كمال كواليس مشاركته في أغنية النجمة شيرين عبد الوهاب الشهيرة 'مشاعر'.

وقال سعيد كمال في تصريحات خاصة لبرنامج 'أرتيستيك'، تقديم ليلى بدران على راديو هيتس: 'من أكتر أعمالي المقربة لقلبي مع شيرين أغنية 'مشاعر'، توزيع أحمد إبراهيم، وتلحين محمد رحيم الله يرحمه'.

وأضاف سعيد كمال: 'أغنية 'مشاعر' كانت عاجباني أوي، ولما سمعتها في الأول حسيت إنى عايز اضيف ليها حاجة في الأول، ولما حكولي عن الأغنية وانها تتر مسلسل، وفيها مشاعر شخصية متضاربة ما بين حنية وغضب وغيرة، ففكرت إنها محتاجة موسيقي منفردة في الأول قبل اللحن ما يدخل مع كلمات وصوت شيرين، وقررت وقتها أعمل المقدمة اللحنية الشهيرة للأغنية من غير ما حد يطلب مني'.

وتابع: 'أضفت جمل ناعمة للكمنجة في الأول، عكس حركات التشيلو اللي قصدت إنها تسبب للمستمع شعور بالضغط، عكس الهدوء اللى بتصدره الكمنجة، بحيث إن الآلتين يعبروا عن المشاعر المتضاربة'.

وأكمل سعيد كمال: 'لما دخلت سجلت المقدمة في الاستوديو، وسمعوها أعجبوا بيها جدا، برغم إن الأغنية مدتها بقت أطول بسبب المقدمة اللحنية، ولكن وقتها قالوا لازم تبقى موجودة'.

تحدث سعيد كمال عن بداية حبه للموسيقى قائلا: 'عرفت إنى بحب المزيكا من وأنا عندي 5 سنين، والدى كان خريج المعهد العالى للموسيقي، كان بيغنى ويعزف عود، وحفظنى أول موشح وأنا عمري 4 أو 5 سنين، وإخواتى الإتنين كمان عازفين كمنجة، ولكنهم أصغر مني'.

وعن انجذابه لآلة الكمان تحديدا، قال: 'كنت داخل المعهد عشان أكمل في مجال الغناء وعزفت أكورديون، ولكن الكمنجة خطفتني، لما شوفت زميلنا أحمد فتحى بيعزف عليها، ساعتها سحرتنى، ووقتها فضلت أقوله علمنى، وهو كان السبب وراء اختياري لعزف الكمان، الكمنجة معبرة جدا، وكتير بتقول اللى معرفش أقوله بصوتى'.

واختتم سعيد كمال قائلا: 'حاليا أقوم بتدريس الكمنجة في المعهد العالي للموسيقي العربية، وآلة الكمان بتحتاج وقت طويل جدا عشان تقدر تكون محترف فيها'.