ناشدت السيناريست مريم نعوم جمهور مسلسل 'لام شمسية' بالحذر في التعليق على الدور الذي يجسده الطفل علي البيلي في العمل، وهو دور الطفل 'يوسف'.

كتبت مريم نعوم عبر صفحتها في موقع التواصل الاجتماعي فيسبوك: 'أنا بكتب البوست ده بصفتي أم مش سيناريست. أرجوكم أرجوكم أرجوكم ماتحملوش الطفل بطل المسلسل أكثر من طاقته بالبوستات اللي فيها أسئلة مربكة أو تعليقات بتوصم الشخصية اللي بيلعبها أو تحليلات غير علمية'.

وأضافت مريم نعوم: 'الطفل ده أشجع من ناس كتير قوي، فأرجوكم نمسك نفسنا شوية عن الرغبة في إننا ننزل بوستات فيها أي تعليقات أو أسئلة ممكن تكون مؤذية حتى لو النية طيبة، لإن الهدف الجماعي أهم بكتير من التعليقات الفردية اللي ضررها هيكون أكبر بكتير من نفعها في اللحظة دي، خاصة إن كل الأسئلة هيتجاوب عليها على مدار الأحداث.. لسة ١٣ حلقة!!'

ويأتي ذلك بعد كشف مخرج مسلسل 'لام شمسية' كريم الشناوي عن تفاصيل الاستعدادات الخاصة التي حرص عليها فريق عمال مسلسل 'لام شمسية' للتعامل مع الأطفال في العمل.

ونشر كريم الشناوي عبر صفحته في موقع التواصل الاجتماعي فيديو من كواليس تضحيرات المسلسل، وكتب في التعليق: 'أثناء تصوير 'لام شمسية' سلامة 'علي'، الطفل اللي بيمثل دور يوسف، وسلامة كل الاطفال في المسلسل كانت من أهم أولوياتنا'.

وأضاف كريم الشناوي: '‏‎علشان كدة، سارة عزيز مديرة ومؤسسة Safe Egypt وعضو مجلس إدارة في المجلس القومي للأمومة والطفولة كانت موجودة في اللوكيشن بتتأكد من سلامته النفسية، وإنه مايمرش بأي مواقف غير محسوبة أثناء التصوير، ‏‎وتم كمان تدريب كل فريق العمل على التعامل مع الأطفال في موقع التصوير'.

وتابع: 'علي بالنسبة لنا مش شخص جاي يقول كلمتين في دور طفل، علي دور رئيسي ومهم و صعب في لام شمسية. و موهبة مصرية قوية و عظيمة تستحق الاهتمام و الفخر. و علاقتنا به و ناحيته ممتدة من قبل المشروع لبعد نهاية العرض بمدة. علي شريك و اصبح عضو في الاسرة اللي بتكبر و بتحاول تجرب و تغامر طول الوقت. احنا محظوظين بعلي و شطارته و عائلته العظيمة اللي دعمته و دعمت موهبته و بيتابعوا وبينسقوا معانا لحظة بلحظة'.

قصة مسلسل 'لام شمسية'

تدور أحداث مسلسل 'لام شمسية' في إطار اجتماعي، ويطرح العمل عددا من القضايا، ومنها علاقات الأزواج والتعدي على الأطفال.

أبطال مسلسل 'لام شمسية'

مسلسل 'لام شمسية' من تأليف مريم نعوم وورشة سرد، وإخراج كريم الشناوى، وإنتاج شركة ميديا هب – سعدي وجوهر، وبطولة أمينة خليل، أحمد السعدنى، محمد شاهين، يسرا اللوزى، ثراء جبيل، صفاء الطوخى وعدد آخر من الفنانين.