لأول مرة فتحت الإعلامية آيات أباظة قلبها وحكت عن رحلتها مع مرض السرطان بعدما تعافت منه.

وفي مداخلة هاتفية ببرنامج 'تفاصيل' قالت آيات أباظة: 'رحلة صعبة أوي لدرجة إني مش مستوعبة إني الحمد لله خفيت ومكنتش متخيلة إني ممكن أمر بالتجربة دي مكنتش متخيلة ممكن اتعرض لكل اللي شفته بس الحمد لله من أول يوم وأنا راضية، وكنت حاسه أن طالما ربنا عمل كده يبقى أكيد بيحبني'.

وعن اكتشافها للمرض قالت آيات أباظة: 'مكنش في حاجة فجأة حسيت أن في وجع في بطني رحت للدكتور طلب تحاليل وعلى طول بينت كل حاجة، اللي راح جاب نتيجة التحاليل كان عمرو محمود ياسين وكان هو بياخد نتيجة أي حاجة بعملها ويقولي النتيجة بطريقة عشان متخضش، أول ما عرف وشه كان مخضوض وفيه حزن'.

وكشفت آيات أباظة رحلتها مع العلاج: 'عملت عملية جراحية كبيرة وصعبة استمرت 12 ساعة في أكتوبر اللي فات، أنا مريت بمرحلتين أخدت كل حاجة علاج وعملية وطلبوا بعد 3 شهور متابعة ومع أول متابعة اكتشفت أن في مكان تاني وابتديت رحلة جديدة'.

وأوضحت آيات أباظة أنها تنسى المرض عندما لا تأخذ جرعات الكيماوي لكن بمجرد أخذها للجلسات تعود كل الآلام قائلة: 'أنا طول ما أنا مش تعبانة من جرعات الكيماوي والعلاج لما ببقى مريحة شوية من الجرعات بنسى إني عيانة وبهزر وبضحك، الموضوع بيبقى كبير لما ببقى تعبانة التعب صعب وببقى نفسيا مش كويشة وأنا عارفة أن أهم حاجة في المرض دا النفسية بس غصب عني لأنه مرض صعب ربنا ما يكتبه على حد'.

ووجهت آيات أباظة الشكر لكل من وقف بجانبها في محنتها قائلة: 'اللي وقفوا جمبي أنا متوقعة منهم دا أهلي وأصحابي وزمايلي هما كانوا على طول معايا حتى اللي مش بيشوفني معايا على طول بالتليفون، هما اللي صبروني، أنا بوظت الحالة النفسية لشهيرة، هي كانت على طول معايا في مرة مكنتش عايزة أخد آخر جلسة كيماوي مكنتش قادرة، كلمتني في التليفون وبعد المكالمة قررت أخد الجلسة هي شخصية قوية وبتقويني'.

وعن أولادها قالت: 'الأولاد وأنا مش تعبانة مش بحسسهم بحاجة، بس وأنا تعبانة لما ببقى في السرير كان أكتر منظر بيتعبني لما بلاقيهم قاعدين حواليا لا حول ليهم ولا قوة وأنا فاهمة هما حاسين بإيه أنهم مش عارفين يعملولي إيه وأنا بتألم مش من المرض من العلاج '.