وجه الإعلامي عمرو أديب رسالة لجمهور الزمالك أكد فيها أنه واثق أن 'الفارس الأبيض' سيفوز في النهاية بالدوري المصري.

وعلق عمرو أديب على فوز الأهلي على الزمالك في القمة الـ133 بالدوري المصري الممتاز.

وقال عمرو أديب في برنامجه 'الحكاية': 'هل في فكرة ما في الحياة ليها علاقة أن ماتش الأهلي والزمالك يخلص دايما مع بداية البرنامج، مش يجب أن تتأمل الموقف اللي أنا فيه وقدري هل في حاجة ما ليها علاقة إني أقعد اشجع الزمالك 50 سنة في هذا الألم والتكرار، لكن أنا مؤمن إحنا بنتكلم في إيه فرقة لامه 11 لاعيب بالعافية وفرقة عندها 30 لاعيب جاهز'.

وتابع عمرو أديب: 'اللي جاب الجول التاني للأهلي لاعيب لسه جاي من شهر يمكن في لاعيبة في الملعب مش عارفين اسمه أنا اشك أن نص جمهور الأهلي عارف اسم اللاعيب دا'.

وأكمل عمرو أديب: 'أنا مصّر إن شاء الله بعون الله هناخد الدوري السنة دي، الأهلي ليس هذا الفريق الكبير عندي 30 لاعيب أه ما كان عنده السنة اللي فاتت وعنده مليارات وكان عنده السنة اللي فاتت'.

واختتم عمرو أديب حديثه: 'قلبي يقطر دما لكن بقول لحضراتكم إن شاء الله الزمالك هياخد الدوري السنة دي وبقوة وتقدم لأن ربنا مع الغلابة'.

وفاز الأهلي على الزمالك بنتيجة هدفين دون رد.