استعاد الفنان سامي مغاوري ذكرياته مع دوبلاج شخصية 'شلبي سلوفان' في فيلم ديزني الشهير 'شركة المرعبين المحدودة'.

وحكى سامي مغاوري خلال لقائه في برنامج 'صاحبة السعادة' مع إسعاد يونس عن نجاح العمل: 'الجميل في شخصية 'شلبي سلوفان' أن الأجيال بتكبر وبقوا أبهات وأمهات ولسه محتفظين بذكرياتهم، بقت العيلة كلها الأب والأم وأولادهم كلهم مرتبطين بـ'شلبي'.

وتابع سامي مغاوري: 'أنا كان عندي خبرة في موضوع الدوبلاج، وأنا صغير لما كنت بمثل إذاعة كان في فيلم 'هندي' ناجح جدا قدمناه كمسلسل إذاعي وشاركت فيه، وبعد حرب 1967 مبقاش في أفلام أمريكية بتتعرض وكانوا بيعرضوا في السينمات أفلام روسية بيتم دبلجتها وشاركت في الدوبلاج بتاعها مع نجوم كبار زي أمينة رزق وحمدي وعبد الله غيث وأخدت منهم خبرات، ولما طلبوني لشخصية 'شلبي سلوفان' كنت شاركت في كذا فيلم مع الأستاذ عصام السيد'.

وأكمل ليحكي كواليس التحضير للشخصية: 'أخدت سيناريو الفيلم بالعربي عشان اتعايش معاه، وكنا بنروح نتفرج عل الفيلم بالأمريكاني وكنت بفهم كل 10 كلمات كلمة لأني خريج التعليم المجاني، وبعدها أروح أسجل كان عندي 4 أيام كل يوم 5 أو 6 ساعات وآخر حاجة الكلمات اللي بنعيدها تاني كأنوا بيأجلوا 'الصريخ' عشان الصوت ميتعبش، عملت شخصية شلبي سلوفان في 35 ساعة وكان جالي دور برد شديد جدا وكنت بقاوم من حبي في الشخصية وحبي في الفيلم'.

وعن ذكريات يوم عرض الفيلم قال سامي مغاوري: 'افتتاح الفيلم كان في المهرجان القومي الأول لسينما الأطفال في الأوبرا وكان في ناس كتير ومحدش يعرفني، كان البوستر كبير وعليه صور الشخصيات بس معلهوش اسمي في شخصيتين تانيين اللي عليهم الأسامي وأنا أخدت على خاطري أن مش حاطين اسمي حتى يقولوا ومع أو جيه بالصدفة، صعب عليا نفسي، دخلت اتفرجت على الفيلم أول مشهدين الأطفال اتخضت، لحد ما اتعرض المشهد الأخير وابتدت دموعي تنزل وأنا بتأثر بالمشاهد دي، مراتي قالتلي أمسك نفسك كل الشركة المنتجة قاعديين وناس جايه من إنجلترا، كان مشهد 'شلبي' وهو بيسيب البنت الصغيرة، لما النور نور في القاعة لقيت المخرج والمنتجة والراجل الإنجليزي بيعيطوا كل السينما كانت بتعيط ولقيت الناس شافوني وجريوا ورايا وفرحت جدا'.

وفيلم 'شركة المعربين المحدودة' إنتاج عام 2001 وقام بدوبلاج الشخصيات محمد هنيدي وسامي مغاوري وحنان ترك وماجد الكدواني وثريا إبراهيم.