حل الفنان هشام إسماعيل ضيفا على برنامج 'لمن يهمه الفن'، الذي تقدمه أميرة نور عبر نغم 'إف إم'، حيث تحدث عن نشاطه في تأليف الكتب، وبعض الأعمال الفنية التي شارك بها.

وقال هشام إسماعيل: 'بكتب سيناريوهات كتير وبعرضها على نجوم وجهات إنتاج، ولكن عملية خروج عمل فنى للنور بتخضع لتوفيق ربنا والصدفة البحتة'.

وأضاف: 'كتبت حوالى 50 أو 60 % من الأفكار والمشاهد في مسرحية 'قهوة سادة'، والمخرج خالد جلال كان بيشجعنا على الكتابة والارتجال'.

وتابع: أصدرت في معرض الكتاب كتاب جديد فيه فيلمين مختلفين عن بعض خالص، فيلم اسمه 'رحلة سعيدة' مليان كوميديا وحدوتة مركبة، وفيلم تانى اسمه 'من كوكب تاني' ودمجت الاسمين مع بعض وسميت الكتاب 'رحلة إلى كوكب تانى'.

وأكمل: 'فكرة فيلم 'من كوكب تانى' بتطرح سؤال: هل الزوج المثالى موجود؟ ولا هو كائن فضائى؟

تحدث هشام إسماعيل عن صفة يحبها هي الوضوح قائلا: 'نفسى أروح لكوكب فيه ناس منطقية، واضحة مش بتخفى ما لا تظهر، لأني بحب الوضوح فى كل حاجة فى حياتى'.

كما تحدث عن مشاركته في مسلسل 'الكبير أوي' قائلا: أكتر حاجة حبيتها فى مسلسل 'الكبير أوى' إنى كنت بعمل حاجة الناس كلها مستنياها، وكنت بحس إنى على المسرح أو إن العمل متذاع على الهوا، ونفسى الكبير يتعمل كارتون.

وعن تعاونه مع نجوم الفن، قال هشام إسماعيل: 'ربنا أكرمني بالعمل مع النجمين يسرا ويحيى الفخراني، والشغل مع يحيى الفخرانى له سحر خاص'.

وعن أعماله الجديدة قال: 'الجديد عندى الفترة الجاية أنا ضيف شرف فى مسلسل 'كلهم بيحبوا مودى' اللى هيتعرض فى رمضان، ومبسوط جدا بالعمل مع الفنان ياسر جلال وباقى مجموعة العمل'.

وتحدث عن حلم فني خاص به قائلا: 'من أحلامي إن يبقى عندى نوع المسرح الخاص بيا اللى بألف فيه وبعمل فيه دور رئيسى، وممكن يبقى معايا بطولة جماعية مختلفة وخاصة بيا، زى أستاذ محمد صبحى، الريحانى، فؤاد المهندس، وبالفعل أنا كاتب مسرحية موقعة مع مسرح الدولة من البداية للنهاية'