كشف الفنان أحمد عبد الوهاب كواليس مشاركته في مسلسل 'ورد على فل وياسمين' والذي يعيده بذكريات مع رحلة مرض زوجته.

وقال أحمد عبد الوهاب في لقاء مع ET بالعربي: 'أول ما كلموني بعتولي المسلسل قريت أول حلقتين انبسطت جدا المواقف مكتوبة حلو أوي، الشخصيات مكتوبة بشكل كويس جدا عجبني الاختلاف اللي في المسلسل بقولهم المسلسل دا دافي جدا، من أول حلقتين قلتلهم أنا موافق'.

وتابع أحمد عبد الوهاب: 'حاولت أطلع شخصية 'طارق' ساذج كيوت مش فاهم حاجات كتير في الدنيا من غير ما يبقى كاركتير هو شخص حقيقي موجود زيه كتير بنشوفهم في حياتنا ففكرة أنك تعمل شخصية متشافة كتير في الحياة بيبقى أصعب من الشخصية المعقدة بكتير الناس بتبقى فاكرة العكس، هو دكتور تحاليل عايش أهله قافلين عليه بيذاكر وينجح ويعمل ماجستير ملوش أي تجارب شقية، هو شخصيته بعد 'إلهام' اتغيرت في الأول كان مش شايف غير هدفه اللي هو هدف أبوه في الأساس مش بيتحمل مسئولية لأن أبوه اللي شايل كل حاجة لحد ما يقابل 'إلهام' وبيتغير ويشيل المسئولية وتحوله حياته كلها، وبتحصل مشاكل بينه وبين الأهل بسبب قصة الحب مع 'إلهام' أنها أكبر منه ومطلقة فإحنا بنوصل رسالة عن قصة الحب دي'.

وتطرق أحمد عبد الوهاب للحديث عن زوجته التي أصيبت بالسرطان في عام 2015 وشفيت منه عام 2023 وقال عنها: 'هي بتدعمني جدا، داليا أنا مقدرش استغنى عنها في حياتي وفي أي مرحلة هي الداعم الرئيسي الكبير ورايا والشخص اللي أنا باخد رأيه وبثق في رأيها هي جانب مهم جدا في حياتي'.

مسلسل 'ورد على فل وياسمين' بطولة صبا مبارك، أحمد عبد الوهاب، فدوى عابد، هديل حسن، سلوى محمد علي، ميمي جمال، وإسماعيل فرغلي، وهو من إخراج محمود عبدالتواب، وتأليف عمرو سمير عاطف ووائل حمدي.