تحدث الفنان أحمد فهمي عن بداياته ومراحل صعبة عاشها في طفولته.

وحكى خلال لقائه في بودكاست 'المحتوى رقم 7' مع محمد طاهر: 'أنا جاي من عيلة إحنا كنا خمس إخوات بنات وأنا الأخ الوحيد وأبويا وأمي وإحنا كنا عيلة تحت خط مستوى الفقر بشوية وكان عندي ساعتها مشكلة في أن أنا داخل الكونسرفتوار فأنا في وسط المعهد أنا أفقر واحد معرفتش اتعامل مع الناس وفي وسط المنطقة أنا الفنان اللي ماسك الكمنجة طول الوقت فالناس بتروش عليا فانا كنت بشوف من اللحظة دي إن أنا الشخص اللي لازم قوته تبقى فيه هو يعني أنا ولا هركز مع حد ولا عايز حاجة من حد وأنا اشتغل على نفسي على قد ما أقدر في كل حاجة بحاول أطور في كل شيء أنا بعمله أيا كان هو إيه من أيام لما كنت عازف كمنجة في الكونسرفتوار لحد بعد كده أنا طلعت الأول على الدفعة وبقيت معيد في المعهد وبعد كده عملت ماجستير'.

وتابع أحمد فهمي: ' في الغناء 'واما' كانت بالنسبة ليا أنا ما كنتش فارق معايا خالص ولا كنت عايز أغني لوحدي ولا كنت عايز أمثل الأول خالص كانت بالنسبة ليا فكرة الغناء وخلاص أنا بعمل حاجة ومش عشان ابقى مغني كنت عايز ألف مزيكا'.

وأكمل أحمد فهمي: 'وبعد كده لما مثلت كان طارق العريان هو بيقولي لازم تمثل ابتديت في الأول غلطت كتير قوي لأن أنا ما كنتش عارف أعمل إيه وأنا وجهة نظري يعني أن الممثل لازم يعرف نفسه هو مشاكله وإمكانياته قبل ما يطلع يتمنظر على الناس أو يقول أن هو بيمثل يعني في ناس دلوقتي ممكن يعمل عمل واحد يحس أن هو نجم العالم خالص التمثيل مالوش نهاية وممكن واحد يعمل مليون حاجة تقع وممكن المليون وواحد دي هي اللي تكسب أو العكس فهي مالهاش كبير فبشوف أن كل واحد لازم يقدم كل حاجة هو بيعملها يعملها من قلبه'.

يذكر أن أحمد فهمي شارك في موسم رمضان 2026 بمسلسل 'اسأل روحك'.

مسلسل 'اسأل روحك' من بطولة ياسمين رئيس، أحمد فهمي، داليا مصطفى، صبرى فواز، نهال عنبر، آيه سليم، ندى السبكى، إسلام جمال ومن تأليف محمد الحناوي، وإخراج أسامة عرابي.