ضمن فعاليات الدورة الرابعة من مهرجان البحر الأحمر السينمائي 2024، عرض فيلم 'سنو وايت'، ونال اهتمام كبير من جانب الحضور الذي تفاعل مع كل أحداثه.

التقى FilFan.com ببطلة الفيلم مريم شريف والمؤلفة والمخرجة تغريد أبو الحسن والمنتج محمد عجمي ليحكوا لنا عن رحلتهم مع الفيلم.

في البداية تحدثنا مع البطلة مريم شريف وطلبنا منها أن تحكي لنا عن دورها في فيلم 'سنو وايت'

الدور مختلف بيبن الشخص قصير القامة بطريقة مختلفة متعرضتش قبل كده في السينما، ادخلوا شوفوا الفيلم وشوفوا التغيير دا هيكون عامل إزاي.

هل فيلم 'سنو وايت' أول تجربة تمثيلية لك؟

مكنش عندي اهتمام أوي بالتمثيل لأن أي دور فيه قصير القامة كان بيبقى فيه تريقة، أنا مش ببقى عايزة أوصل الرسالة دي أن قصير القامة مباح للتريقة عليه، لما قابلت الأستاذة المخرجة تغريد أبو الحسن حسيت أنه حاجة مختلفة، مكنش عندي خلفية عن السينما والتمثيل وأستاذة تغريد أدتني بنفسها ورش تمثيل بتبين الشخصية وإزاي أقف قصاد كاميرا وأطلع المشاعر.

هل ستكررين تجربة التمثيل؟

لو حاجة برا إطار السخرية إن شاء الله.

التقينا أيضا بالمؤلفة ومخرجة الفيلم تغريد أبو الحسن التي حدثتنا عن رحلتها مع الفيلم.

من أين جاءت لك فكرة فيلم 'سنو وايت'؟

الموضوع كان شاغل بالي من طفولتي وأنا كان في مربية لصديقة ليا كانت شخصيتها قوية جدا، ولما كبرت لقيت كان في نظرة مختلفة من المجتمع كنت بروح مسرح وأعمال فنية كتير كنت بلاقي تجربة ومعاملة مختلفة تماما لقصار القامة غير التجربة اللي أعرفها، طول السنين كان عندي حلم إني أظهر الجانب اللي شفته القوة والمشاعر ونبقى بنبص لمنظور مختلف لقصار القامة لحد ما كتبت السيناريو ومكنتش متوقعة أنه هيخرج للنور لأن في قواعد كتيرة أوي بتربطنا زي أن نلاقي منتج، وزي فكرة شباك التذاكر، لكن أنا فخورة أننا قدرنا نوصل رسالة زي دي ممكن تأثر على رؤية المجتمع كله لقصار القامة بعد كده ودا يبقى شرف لينا لو قدرنا نشجعهم أنهم يندمجوا أكتر ويحسوا أنه محبوبين ومقبولين.

ما شعورك بعد المشاركة في المهرجان والنجاح الذي حققه؟

الحمد لله إحنا مكناش متوقعين الاستقبال دا والروح دي في الصالة، الحضور أنا بشكرهم على روحهم وتركيزهم في الفيلم، كان في وقت في ضحك وفي وقت في تركيز ودموع مش حزن دموع فرح كنا مستغربين ومش متوقعين ودا بيدل على أن الجمهور اللي كان حاضر واختيار المهرجان بنشكرهم عليه وضح قد إيه هما شايفين القصة زي ما إحنا نفسنا تتشاف للجمهور وتتشاف للعالم كله برسالة.

تحدثنا أيضا للمنتج محمد عجمي عن حماسه للفيلم وقرار إنتاجه.

ما الذي شجعك لإنتاج الفيلم الذي يعتبر مغامرة لأي منتج؟

الإنتاج بشكل عام ليه أنواع وأهداف، في منتج بيبحث عن الإيرادات ودا شيء طبيعي، ودايما هيفكر في الشخصيات والممثيلن والنجم اللي بيحصد تذاكر الشباك ليها معايير خاصة، إحنا كنا حابين المشاركة في الأفلام القصيرة وقررنا نمزج ما بين الترفيه وفي نفس الوقت تكون الرؤية الإبداعية هي محركة الأحداث ندخل في قصص واقعية مصرية فيها طبقات من الإبداع وفيها مزيكا، الفيلم ميكونش بس دراما لا بنلعب بالمشاعر النوعية دي مختلفة، فيلم 'سن ووايت' لما تحمست ليه أنه قدم شيء مختلف وأن في مواهب محتاجين يتشافوا على الكاميرا.

ومريم شريف، بطلة فيلم 'سنو وايت'، هي دكتورة صيدلانية درست في الجامعة الألمانية بالعاصمة برلين.

يتناول الفيلم قصة إيمان، وهي شابة مصرية قصيرة القامة، تحلم بالحب والزواج مثل أي فتاة أخرى، لكنها تواجه صعوبات عديدة نتيجة معايير الجمال المجتمعية والثقافية.

تلجأ إيمان إلى مواقع التواصل الاجتماعي للتعبير عن نفسها بحرية، بينما تحاول في الوقت نفسه إتمام زواج أختها الكبرى.

الفيلم من إخراج تغريد أبو الحسن، وإنتاج محمد عجمي، وبطولة: مريم شريف، ومحمد ممدوح، ومحمد جمعة، وخالد سرحان، وصفوة، وكريم فهمي.