أشاد المخرج عمرو سلامة بفيلم 'برشامة' الذي ينافس ضمن موسم أفلام عيد الفطر ويتصدر الإيرادات.

وكشف عمرو سلامة عن 7 ملاحظات في رأيه هي سبب نجاح الفيلم وكتب عبر حسابه بموقع X:

سبع ملاحظات على فيلم (برشامة):

1) الكتابة.. الكتابة.. الكتابة.. المقولة المشهورة بتقول 'الكتابة هي الملك'، والكتابة يعني مش بس موهبة، وكمان وقت، وكذا دماغ بتفكر سوا، وتعديلات، واقتراحات، ونسخة نهائية تطلع بعد استنفاذ كل محاولات التطوير.

2) الجودة، أحلى درس مستفاد، إن الكوميديا بيفرق معاها الجودة، جودة الإخراج، الإنتاج، التمثيل، الكاستينج، التصوير، المزيكا، المونتاج، وكل العوامل الثانية، إن الكوميديا تتعمل بجودة مهم، مش المنطق الكسول بتاع علشان بنعمل فيلم كوميدي نبقى بنهرج وبس، والمهم الضحك وكل حاجة ثانية مش مهمة.

3) الإيثار من نجم العمل، أو بمعنى أصح تغليب مصلحة الفيلم على مصالحه الضيقة، إنه يبقى مستعد وهو نجم يقدر يعمل فيلم يتصدره بالكامل يدي مساحة للي حواليه، هشام ماجد مش بس ممثل وإنسان محترم وشخصية سالكة، هشام ذكي عارف إن مصلحة فيلمه ككل من مصلحته المباشرة.

4) التوقيت، نزول الفيلم مع منافسة معقولة ما تسحقوش، موسم منطقي - بعيدا عن كارثة وفضيحة سحب فيلم بعد نزوله وإجازته من الرقابة - لكن كان موسم متوازن وعادل.

5) التوفيق، والحظ السعيد إن معظم نجوم الفيلم كانوا مكسرين الدنيا في الموسم الرمضاني، مع افتقاد الناس لهشام ماجد علشان اختفى الموسم ده.

6) الإصرار، إصرار المخرج والمنتج والكتاب على الفيلم، وإيمانهم بيه. بعد ست أو سبع سنين من محاولات صنعه اللي واجهتها مصاعب كثير.

7) الإيمان بالجمهور، الجمهور لما يتقدمله حاجة حلوة هيعرف يقدرها، اه الجمهور داخل يضحك، وضحك، بس عارف يقدر الصنعة ويحترم المجهود، ويفهم الاختلاف.

مبروك لكل صناع العمل، وكل الأمنيات إن باقي الصناع - ولا استثني نفسي - يتعلموا و'يغشوا' من برشامة الدروس الصح.

تدور أحداث فيلم 'برشامة' في يوم امتحان اللغة العربية في لجنة الثانوية العامة (منازل)، حيث تتشابك مصائر مجموعة من الشخصيات داخل اللجنة، وسط فوضى وفساد وغش جماعي، ومحاولات من أهالي الطلاب لمساعدة أبنائهم على الغش بطرق مختلفة، في إطار كوميدي ساخر.

فيلم برشامة' من بطولة النجوم هشام ماجد، مصطفى غريب، ريهام عبد الغفور، حاتم صلاح، باسم سمرة، عارفة عبد الرسول، فاتن سعيد، كمال أبورية، ميشيل ميلاد، فدوى عابد، من إخراج خالد دياب وتأليف أحمد الزغبي، شيرين دياب، خالد دياب.