'رجعت مصر وصلاح شاهين عرف إنى رجعت فاتصل بيا وقال لي قال لي يا أخي مستنيينك تعالي هنعمل فيلم (شفيقة ومتولي)'.

كانت هذه كلمات االفنان الراحل ناجي شاكر رائد فن العرئيس ومصمم الملابس والديكور الكبير، التي تحدث فيها عن كواليس عمله في فيلم 'شفيقة ومتولي' وتعاونه مع الفنانة سعاد حسني، التي حكاها في فيلم 'النحت في الزمن - ناجي شاكر' للمخرج يوسف ناصر.

وأكمل الفنان ناجي شاكر الذي صمم عرائس أوبريت 'الليلة الكبيرة' ذكرياته مع فيلم 'شفيقة ومتولي' قائلا: رحت قعدت معاهم وتخيلت 'شفيقة' ورسمت لها اسكتشات، وصلاح قال لي تعالى بقى أعرفك على سعاد، كنت واحد مش معروف خالص أول مرة اشتغل في السينما ومحدش يعرف عني حاجة، وقابلت سعاد حسني كانت ست لطيفة كده وبسيطة.

وواصل: بوريها الاسكتشات بصت كده وقالت لى إيه ده يا ناجي ده؟ قلت لها إيه بس زعلانة ليه؟ قالت لى عامل لي جلابية تدخل 3 سعاد حسني جواها! وكمان عامل لي شعري منكوش، قلت لها أنا عامل جلابية لشفيقة مش لسعاد حسني أنا عاوزك تبقى شفيقة مش سعاد.

واستطرد: قالت لي يعني انت شايف ده يبقى كويس؟ قلتلها نجربها، عملت لها الجلابية وباروكة منكوشة بشعر أكرت، هي كانت متعودة على اللبس الشيك اللي يليق على بنوتة جميلة، مكانتش متخيلة النقلة الكبيرة دي.

وأضاف: قلت لها هعملها نجبها، وعملت لها باروكة، وقلت لها الجلابية دي لازم تلبسيها أسبوع في البيت قبل التصوير، الممثل لازم يتفاعل مع اللبس ويتأقلم معاه.

يذكر أن الفنان ناجي شاكر حصل على جائزة المهرجان القومى للسينما عن الإشراف الفني وتصميم الديكور والملابس لفيلم 'شفيقة ومتولي'، الذي قام ببطولته: سعاد حسني، وأحمد مظهر، وأحمد زكي، إخراج علي بدرخان وإنتاج عام 1979.