كشفت الفنانة تيسير فهمي سبب ابتعادها عن الساحة الفنية لمدة 13 عاما.

وخلال لقائها في برنامج 'الستات' مع مفيدة شيحة وسهير جودة أكدت تيسير فهمي أنها لم تعتزل الفن بل فقط قررت الابتعاد قائلة: 'في الأول كان قرار أني أخد فترة توقف، وانشغلت بحاجات تانية اجتماعية، بعدين معرفش السنين جريت لوحدها، سنة ورا سنة الواحد مبقاش يحس'.

وتابعت تيسير فهمي: 'مأخدتش القرار على أنه اعتزال، أخدته على أنه في حاجة عايزة ألاقي نفسي فيها، مكنتش زعلانة من أي حاجة بالعكس لآخر لحظة قبل ما أقرر القرار دا كنت بتشغل وكان عندي فيلمين ومسلسل ومكنش عندي أي مشاكل وعندنا شركة إنتاج مفيش حاجة تزعلني'.

وأضافت تيسير فهمي مازحة: 'يمكن عملت فيكم خير يعني كفاية، أنا تخيلت إني بعمل فيكم معروف هي جات الظروف أنا وقتها قررت أتجه للعمل الاجتماعي وانشغلت بيه، والسنة بقيت بحس أنها شهر'.

وعن فكرة عودتها مجددا قالت تيسير فهمي: 'التمثيل خصوصا مع واحدة زيي عاشقة ليه أكيد بيوحشني لكن أنا لما بتفرج بكون كمشاهدة، حتى مش بنتقد أنا بندمج مع العمل أحبه أو محبوش، وأكتر الحاجات اللي عجبتني في رمضان السنة دي 'لام شمسية' وعجبني 'تحت الوصاية' أنا بحب الأعمال اللي ليها هدف ومعنى وبتحسي أنها بتقول أن الفن له جدوى، بتعملي ضوء على قضايا مهمة في المجتمع'.

يذكر أن آخر أعمال تيسير فهمي كان مسلسل 'الهاربة' الجزء الثاني، وشاركها في بطولته أحمد راتب، صلاح رشوان، رشيد عساف، فؤاد شرف الدين، أشرف مصيلحي، سامح السيد، أيمن عزب وعلي حسنين، قصة أحمد أبو بكر، سيناريو وحوار محمد سليمان، إخراج يوسف شرف الدين.