لايف ستايل
موقع كل يوم -في فن
نشر بتاريخ: ٢٣ تشرين الثاني ٢٠٢٦
حل الفنان الكبير فاروق فلوكس ضيفا على برنامج 'لمن يهمه الفن'، الذي تقدمه أميرة نور على 'نغم إف إم'.
وتحدث فاروق فلوكس عن الكثير من الأمور الشخصية وكواليس أعماله، وتكريمه الأخير من مهرجان القاهرة السينمائي الدولي، قائلا:
-مسكت دموعي بالعافية لحظة تكريمي بمهرجان القاهرة السينمائي، ووقوف النجوم ليا، وحسيت إن مشوار حياتي في الفن ما ضاعش هباء
-شاركت في عرض مسرحي على مسرح الريحاني وكانت المسرحية مفتتحة بقالها ١٥ يوم، وعرفت خبر وفاة والدتي وقت العرض، وبعد ما خلصت إجراءات الدفن طلعت على المسرح
-قولت لوالدي إن في اتفاق شرطي بين الممثل وجمهوره، وعدلي كاسب قال في نهاية المسرحية للجمهور إن حياة الفنان ممكن تبقى فيها دموع، وإني تركت والدتي المتوفية وهدفنها اليوم اللي بعده عشان خاطر المسرح، والجمهور انهال بالتصفيق واغمى عليا وقفلوا الستار
-لو أنا مكان الأستاذ حسين فهمي ههدي جائزة الهرم الذهبي للضيف أحمد و لنجمة مصر الأولى نبيلة عبيد
-كنت بشتغل بإخلاص شديد في دوري مع نبيلة عبيد بفيلم 'الراقصة والسياسي'، ومحدش هيقدر يعمله زيي وهي كانت ممتازة
-دوري في مسلسل 'دموع في عيون وقحة' كان لأسامة عباس، وهو اللي رشحني للدور ده بعد ما اعتذر عنه لسفره، واتفاجئ المخرج يحيي العلمي من أول أداء ليا في شخصية الخواجة ديموس
-بحب الفنان أحمد حلمي، ومحمد ممدوح فنان له وضعه، وحنان مطاوع أيقونة من الأيقونات الجديدة في عالم الفن النسائي وطالعة لأهلها
-الفنان ما ينفعش يسعى للمادة بس، ولازم يحب الشغلانة عشان الشغلانة كمان تضيف له ويكون فنان أصيل
-الأستاذ فؤاد المهندس كان بيعتبرني زي ابنه، وكنت بتابع صحته لما كان بيتعب، و زعل مني لما كنت في العمرة عشان ما زورتهوش وهو تعبان ورفض الصلح بعد ما رجعت، فعملت مسرحية باسم عيد ميلاد فؤاد في بيتي، وجمعت كل الشخصيات اللي بيحبها في حياته الفنية واتصالحنا
-بحب أدي لكل واحد من أولادي حقه، وبحب أنصحهم وأساعدهم وأقف جنبهم، وبدعيلهم يوميا في صلاة الفجر
-بقول لأحمد فلوكس ربنا يقويك و يرزقك بعمل فني من بطولتك في رمضان، وبقول لبنتي يُسر ربنا يوفقك ويبعد عنك شر الأخرين، ولهبة بقولها خدي بالك من ولادك ويوفق ولادك في رياضاتهم
-أنا شقيت كتير في لعبة الفن، وحبيت الفن لدرجة العشق، وبشكر ربنا إنه أعطاني الموهبة دي، ونجاحاتي اللي وصلتني للتقدير والجائزة الأخيرة اللي أخدتها




























