وجهت الفنانة هنا شيحة رسالة للسيدات موضحة رأيها عن بعض المواضيع التي لا يتم الحديث عنها بشفافية واضحة فيما يخص النساء في السينما المصرية.

وقالت هنا شيحة في لقاء مع قناة 'النهار' على هامش حفل ختام الدورة التاسعة من مهرجان الجونة السينمائي: 'جسمنا مش عيب ومش عورة ومحتاجين يبقى عندنا وعي أكتر بنفسنا وبجسمنا ومش عيب إنك تكلمي بنتك أو ابنك إزاي تحترم الجسد، وإزاي تحترم البنات وتاخد بالك منهم وإزاي البنت يبقى عندها الوعي دا'.

وتابعت هنا شيحة: 'في جيل كامل مبنتكلمش بصراحة ومبنقولش الحاجات بأساميها بصراحة ومبنعلمش بناتنا عن جسمهم وبنعلمش بناتنا إزاي يعرفوا يتعاملوا مع الآخرين ولا الولاد ولا البنات مش بس قصدي اتكلم عن البنات بتكلم الأولاد بصفة عامة الجيل الجديد ذكور أو إناث والجيل القديم وإحنا مكانش عندنا برضو'.

وأكملت هنا شيحة: 'يعني أنك تبقى عارف حدودك فين وحدود الآخرين فين وأن أنت تبقى عارف إزاي تتعامل مع نفسك ومع الآخرين وتبقى عارف إيه الصح وايه الغلط في مفاهيم كتيرة جدا غلط ابتدت تتعرف دلوقتي أكتر مثلا أن دا اسمه تحرش زمان مكانش دا بيبقى موجود، أن في حاجة اسمها لازم تبقى موافق في العلاقة الزوجية ولما تحب محدش يغصب عليك، الحاجات دي كلها دلوقتي ابتدى يتسلط الضوء عليها زمان محدش كان بيتكلم فيها'.

وأضافت هنا شيحة: 'حضرت ندوة بتتكلم عن تمكين البنات الصغيرين وتعليمهم عن جسمهم ويعني إيه دورة شهرية إزاي ميخافوش لأن في ناس لحد دلوقتي مبيعلموش بناتهم وبيبقى في جهل لو أنت مش عارف هتعرف إزاي أو بيبقى في كسوف'.