كشفت الفنان المعتزلة شهيرة على حسابها الشخصي على 'فيس بوك' تعرضها لحالة اختناق اثناء ابتلاع فص ثوم.

كتبت شهيرة تفاصيل الواقعة قائلة: 'مش عارفه أخترت الصوره دي عشان أعبر عن اللي حصلي النهارده صحيح الموضوع ممكن يكون بسيط ومش بسيط بالنسبه للطائرات اللي ظهرت في سماء أمريكا التي تطير بدون طيار ( الدورنز) وأن فيه أكوان وعالم تاني موجودين.

وأكملت: أنا حكايتي بسيطة بالنسبه للأحداث دي، ولكنها بتقولي وبتقولنا كلنا (إن بين طرفه عين وانتباهتها يغير الله من حال إلى حال)، أنا من أيام قالتلي اللي بتساعدني في البيت يا مدام ما تخدي كل يوم واحده توم على الريق تقوي المناعة وأنا سمعت الكلام وبقالي يومين بعمل كده، النهاردة التومة كانت كبيرة فقسمتها نصين وبلعت نص وهنا الموضوع فجأه لقيت نص التومة دي وقفت ما بين الحلق والبلعوم، وشربت قزازه ميه عشان تنزل مافيش فايدة، فضلت راحه جايه مش عارفه انزلها أزاي، وشربت حاجة سخنة مرة وأتنين واحاول أبلعها وهي رافضه انزعجت وخاصه أني لوحدي وبقيت مش عارفه أعمل أيه لأن مكانها حاسه فيه بألم وشبه خنقة بس مش خنقة، وكده لمدة أكتر من نص ساعه.

وواصلت شهيرة القصة: تأملت الموقف وقلت سبحانك ربي انت أعيطتنا نعم كتيرة ولا ندركها ألا في الوقت الصعب المهم اني فجأه أحسست اني عايزه ارجع اللي في بطني مع انها معلقه فوق ومانزلتش في المعدة، وفعلا محاولات تقيأ ولكن ما بيحصلش أثناء هذه المحاولات تحركت من مكانها ونزلت في معدتي، قلت ياااه الحمد لله شكرا يارب، بقي نصف تومه تلخبط كيان الإنسان كده واحنا رايحين جايين بنبلع عادي كأنها أجهزة المفروض انها تشتغل عادي لأ دي بتشتغل مش عادي دي بأذن ورحمه ربنا بينا.

يارب أحنا لازم نشكرك على نعمك التي لا تعد ولا تحصى، (طبعا مكانها لسه فيه ألم من كثره محاولات البلع الفاشلة) ولكن شكرا لك يا رب علي نعمه البلع التي من نعمك العظيمة التي تعطيها لنا من غير حول ولا قوه منا والحمد لله.