كشف الفنان مصطفى كامل نقيب المهن الموسيقية أنه لم يتواصل مع الفنانة أنغام مؤخرا وذلك بسبب تجاهلها الرد على رسائله.

وقال مصطفى كامل في لقائه ببرنامج ET بالعربي: 'أولا قبل أي حاجة ألف سلامة عليها وربنا يقومها بألف سلامة ويشفيها لأبنائها ولجمهورها لكن أنا آخر مرة علمت أنها تعبانة أنا بعتلها رسالة مردتش، وللأمانة مبعتش رسايل تاني أنا مؤمن بدوري المؤسسي وبأني أه لازم أكون حبيب الكل وزميل الكل بس مش هقعد أدور على فنان زميلي وهو ميردتش لا هي بتبقى في حاجة اسمها تقدير دوري كنقيب أني اطمن لما تبقى زميلتي وبحبها الطبيعي لما تشوف رسالتي وأنا بطمن عليكي أنا مبقولكيش ابعتيلي فلوس سلف، المفروض تردي هي لما مردتش المرة اللي فاتت مبعتش تاني مبحبش على نفسي كده خصوصا أن كمان الفنانة دي بالنسبالي حاجة كبيرة أوي ولطيفة وأنا بحبها على المستوى الفني والشخصي وبينا كل حب واحترام'.

وتابع مصطفى كامل: 'لو ابني ولا مراتي قرت وقالتلي أنغام بعتتلك لو أنا مش قادر أرد هقولها ردي عليها قوليلها ميرسي يا أنغام الحمد لله هو تمام فإنك مترديش عليا لا أنا مش هتصل تاني'.

على جانب آخر، كشف الإعلامي محمود سعد تفاصيل جديدة عن الحالة الصحية للفنانة أنغام وطالب الجمهور بالدعاء لها.

وقال محمود سعد: 'هكلمكم عن صديقتي العزيزة الغالية أنغام كان بينا اتصال وأنا بتابع معاها كل يوم، مرات بكلمها ومرات بكلم عمر ابنها الكبير وبيطمني عليها، بس هي الحقيقة تعبانة وفي ألم جامد وبتمر بتعب جامد، لأن في مشاكل إن شاء الله يمكن بعد 3 أو 4 أيام نقدر نشوف، ادعولها لأنها بتمر بألم عنيف'.

وتابع محمود سعد: 'الحكاية صعبة لكن إن شاء الله مفيش حاجة خطر لكن في ألم ومش عارفين إيه هيحصل يوم الأربع والخميس اللي جايين، هي دلوقتي في المستشفى وقاعدة لآخر الأسبوع إن شاء الله ومعاها ولادها وأصحابها أنا عايزكم تدعولها ربنا يخفف عنها هذا الألم عشان تعبر هذه الأزمة الصحية العنيفة'.