كشفت النجمة دنيا سمير غانم عن أنها ظلت تعاني من نوبات رغبة شديدة في البكاء بعد رحيل والديها، النجمين الكبيرين سمير غانم ودلال عبد العزيز، وكانت لا تستطيع البقاء بمفردها لحظة واحدة.

وقالت دنيا سمير غانم خلال لقائها مع الإعلامي أنس بوخش في برنامج ABTalks: 'في الأول مكنتش بقعد مع نفسي ولا ثانية. وبيحصل مواقف في الشغل، آخر فيلم عملته 'روكي الغلابة' كانت أختي ضيفة فيه وأول مرة بابا وماما مش موجودين معانا .. وفجأة جالي عياط مش طبيعي . اللي بيصبر الرضا وتبقى عارف إن ربنا هو اللي كتب كده'.

كما كشفت دنيا سمير غانم عن بعض الوسائل التي تلجأ إليها للتغلب على حزن الفراق قائلة: 'أي أب وأم لازم تعملوا ذكريات حلوة جدا مع ولادكم. حاجة بحبها أوي وطبعا مبعملهاش كتير عشان بتتعبني بقعد أسمع صوتهم. وكتير أوي بعمل الحاجات اللي بيحبوني أعملها يمكن يبقوا سعداء. وبقعد أسمع الدعاء بتاعهم ليا ساعات ده بيهون عليا'.

وأكدت دنيا سمير غانم أن فترة مرض والديها ورحيلهما فترة لا يمكن تجاوزها بقولها: 'الفترة دي ما بتتمسحش، بحاول على قد ما أقدر أتغلب عليها ومفكرش في الحاجات الوحشة، لكن الحزن بيفضل موجود، والإنسان بيحتاج أكتر للشخص اللي فقده مع الوقت.. ربنا هو اللي بيعرف يديك القوة ويخليك تكمل'.

وأضافت: 'أي إنسان حتى لو كبير تلاقيه يقول لك أنا عايز أمي أنا عايز أبويا .. صورتهم وهما تعبانين مش بتفارقني'.

يذكر أن الفنانين الكبيرين سمير غانم ودلال عبد العزيز رحلا عن عالمنا عام 2021 إثر إصابتهما بمضاعفات فيروس كورونا المستجد (كوفيد-19)، وفصل بين رحيلهما بضعة أشهر فقط، مما شكل صدمة كبيرة للوسط الفني العربي.

يشار إلى أن آخر أعمال دنيا سمير غانم في السينما فيلم 'روكي الغلابة'، من بطولتها ويشارك في البطولة محمد ممدوح، محمد ثروت، وأحمد طلعت، وبيومي فؤاد، ومحمد رضوان، وكايلا ابنة دنيا سمير غانم، وهو من تأليف كريم يوسف، وإخراج أحمد الجندي.

وتدور أحداث 'روكي الغلابة' في إطار اجتماعي لا يخلو من الكوميديا والمواقف الإنسانية، حيث تلعب دنيا سمير غانم دور فتاة تنتمي لبيئة ريفية بسيطة، وتجد نفسها فجأة وسط عالم مختلف حين تنخرط في عالم الملاكمة، وتُكلّف بمهمة غير متوقعة وهي حراسة طبيب يجسد دوره الفنان محمد ممدوح، تتعرض حياته للخطر من جهات غامضة.