شاركت الكاتبة اللبنانية ندين جابر متابعيها التجربة الصحية الصعبة التي خاضتها مؤخرًا، وتمكنت من تجاوزها بفضل التشخيص المبكر والعلاج المناسب.

ونشرت ندين صورة تظهر أثر الجراحة في رقبتها بعد خضوعها لعملية ديسك، وأرفقتها برسالة مؤثرة قالت فيها: كتار عم يسألوني بس يشوفوني إذا جرح العملية اللي برقبتي رح يروح، جوابي بكون، إيه، خف كتير وبيروح مع الوقت، بس أنا ما بدي ياه يروح، لأنو بدي كل ما اطلع بالمراية اتذكر أنو أهم شي بالحياة هي الصحة، وأي شي تاني مش محرز.

ندين جابر: المرحلة اللي مريت فيها صعبة

في اتصال مع موقع 'فوشيا'، شرحت ندين جابر تفاصيل معاناتها مع المرض قائلة: بآخر أيام كتابة الحلقات الأخيرة من مسلسل بالدم، صار عندي وجع مش طبيعي بكتافي ورقبتي وراسي، عملنا تصوير طلع عندي 3 ديسكات برقبتي، فعطوني علاج كورتيزون، ولمّا خلصت كتابة، وقفت الكورتيزون فرجع الوجع متل ما كان، وما كان عندي خيار غير أعمل العملية، لأن الوجع كان مش طبيعي.

وأوضحت أن الجراحة أُجريت عبر الرقبة من الأمام، وفقًا للطريقة الحديثة في هذا النوع من العمليات، لافتة إلى أنها أرادت أن تكون صريحة في الحديث عن الجرح لأنه يرمز لتجربة صعبة ومغيّرة في حياتها.

وقالت ندين: وين ما بروح بيسألوني إذا هاد الجرح بروح أو لا؟، بقلهن إيه بيروح مع الوقت، بس عنجد ما بدي ياه يروح؛ لأن المرحلة اللي مريت فيها كانت صعبة بس غيّرت فيني، وما بدي انساها، لأنها بتخلينا نفكر أنو المشاكل كلها قدام الصحة ما إلها قيمة.

وتُعد ندين جابر إحدى أبرز كاتبات الدراما اللبنانية، وكان آخر أعمالها مسلسل 'بالدم' الذي عُرض في موسم دراما رمضان 2025، وقدّمت خلال مسيرتها عددًا من الأعمال الناجحة التي لاقت صدى واسعًا في العالم العربي، من أبرزها: 'ع أمل'، 'للموت'، 'صالون زهرة'، 'عروس بيروت'، و'لو'، وغيرها من المسلسلات التي عكست أسلوبها المميز في تناول القضايا الاجتماعية والإنسانية.