لم يتمالك الفنان محمد حماقي دموعه خلال حديثه عن والده الراحل.

وخلال لقائه مع Billboard Arabia قال محمد حماقي إن والده توفي قبل 12 عاما وهو يفتقده دائما.

وأضاف متحدثا عن والده: 'أبويا شهادتي فيه مجروحة بس بشهادة الناس اللي اتعاملت معاه كان إنسان مش عادي طيب وحنين وذكي جدا حتى في تربيته لينا'.

وأضاف محمد حماقي: 'مفتكرش مرة زعلت منه حتى لما كنت ببقى غلطان وبيعاقبني عقابه مكانش بيزعلني كان بيختار طريقة للعقاب تعلم أكتر ما تزعل مفتكرش أن في يوم حسيت أنه قاسي عليا دايما كنت بحس أنه خايف عليا عمره ما أجبرني على شيء وكان متفهم وبيسمع حتى لو كنت بقول حاجة تافهة، ولو أنا واثق في نفسي دا أكيد بسببه، أنا مفتقده دايما'.

وتحدث محمد حماقي خلال اللقاء عن مشواره الفني متذكرا الألبومات التي طرحها خلال السنوات الماضية والنجاح الكبير الذي حققه.

كما رد على الجدل الذي أثير بسبب أغنيته 'بحريه' وقال عنها: 'أنا طول الوقت بقول أنا لو عملت أغنية الناس 'مهنجتش' قدامها شوية يبقى مفيهاش حاجة جديدة، ممكن تقف شوية قدامها متبقاش مستوعب وبعدين تحبها أوي دا معناه إن في حاجة جديدة وحلوة، الأغاني اللي من أول لحظة تحس أنك عارفها دي أغلب الوقت مفيش فيها حاجة جديدة'.

وتابع محمد حماقي: 'أغنية 'بحريه' من النوع اللي فيه حاجة جديدة بتاخد وقت عشان تستوعب وبعدين بتنبسط وبتحبها، الأغنية كان بقالها كتير معايا، وشيرين عبد الوهاب أقتنعت بيها وأول مرة سمعتها قامت وقفت من مكانها وقالت 'أنا بقالي سنين مسمعتش حاجة حلوة كدة' والأغنية فيها عناصر كتير مهمة، أولا أنا وشيرين مصريين والأغنية من قلب ثقافة المصريين كألفاظ وكموضوع، فكرة البنت اللي بتقول لحبيبها تعالى أتقدم ودي فكرة اجتماعيا حلوة فكرة 'طيبة' شبه المصريين، وفكرة الشاي في العصرية دي ليها علاقة بالثقافة المصرية، زمان لقطة اليوم عند أغلب الشعب المصري هي كوباية الشاي اللي بتتشرب في البلكونة وقت العصر، أستاذ محمد الموجي كان ليه أغنية زمان غناها بنفسه كانت بتقول 'يا فنجان شاي مع سيجارتين ما بين العصر والمغرب'، هي بتحلم بفكرة أنها هتتجوز حبيبها وتبقى قعدة كوباية الشاي دي معاه هو مفيش حاجة غلط خالص في الأغنية هي ألفاظ مش معتادين عليها زي كلمة 'الفراندة' محدش بيستخدمها ودي حاجة حلوة أن نحيي جزء من تراث وثقافة الشعب المصري حتى كألفاظ فكرة الكلام بتاع 'بحرية' أنا بشوف أن عزيز الشافعي أبدع في اختياره للألفاظ وسرد الحكاية بالصورة الثقافية المصرية واللحن كان خطير وتوما عمل مزيكا خطيرة'.